Andijon viloyatidagi xonadonlarda qoidaga zid ravishda saqlanayotgan maishiy gaz ballonlari aniqlandi. Bu haqda “Hududgaztaʼminot” AJ xabar berdi.
Maʼlum qilinishicha, joylarda suyultirilgan gaz mahsuloti taʼminotida noqonuniy holatlarni aniqlash bo‘yicha nazorat tadbirlari olib borilmoqda.
Jumladan, Izboskan tumanidagi “Markaz” MFY, Ziroat ko‘chasida yashovchi N.A. xonadoni ko‘zdan kechirilganda 24 dona, mazkur MFYning Vafo ko‘chasida istiqomat qiluvchi Sh.I. xonadonida 37 dona maishiy gaz balloni texnika xavfsizlik talablariga zid ravishda saqlanayotgani aniqlandi.
Bundan tashqari xonadonni ko‘zdan kechirish davomida maishiy gaz balonlarni tortish uchun 2 dona (“Menbo” va “Leder” rusumli) elektron tarozilar va avtomobillarga propan gaz o‘tkazish uchun maxsus moslashtirilgan 4 dona rezina shlanglar borligi aniqlandi.
Shuningdek, Shahrixon tumanidagi “O‘zbekiston” MFY Shaydullayev ko‘chasida yashovchi fuqaro M.A. o‘z xonadonida 94 ta, “Yangi hayot” MFY Navbahor ko‘chasida yashovchi Q.R. esa 57 dona maishiy gaz ballonlarini saqlab kelayotgani maʼlum bo‘ldi.
Holatlar yuzasidan dalolatnomalar tuzilib, barcha hujjatlar FVB va huquq-tartibot organlariga topshirildi.
Noqonuniy tarzda saqlangan maishiy gaz ballonlari
Joriy yil fevral oyida Samarqand viloyati Toyloq tumanida suyultirilgan gaz sotuvidan tushgan mablag‘larni o‘zlashtirgan shaxslar aniqlangandi.
Shuningdek, sentyabrda Samarqand viloyati Urgut tumanida 110,7 mln so‘mlik suyultirilgan gazni o‘zlashtirgan chilangar-taʼminotchi aniqlangan edi.
Bundan tashqari, Farg‘onada 414 dona suyultirilgan gaz ballonini talon-toroj qilish holati aniqlangan.
Izoh (0)