Farg‘onadagi “Istiqlol” stadionida bo‘lib o‘tgan futbol bo‘yicha O‘zbekiston kubogining final o‘yinida Namanganning “Navbahor” va Andijonning “Andijon” jamoalari maydonga tushdi.
Ularni qo‘llab-quvvatlash uchun har ikki viloyatdan ham ko‘plab muxlislar keldi: stadion deyarli to‘ldi va tomoshabinlar soni 20 ming kishini tashkil etdi.
Uchrashuv dastlabki daqiqalardan shiddatli tus oldi, har ikki jamoada ham imkoniyatlar bo‘ldi, ammo birinchi bo‘limda hisob ochilmadi.
Ikkinchi bo‘limning 53-daqiqasida “Navbahor” klubi aʼzosi Abror Ismoilov kuchli zarb bilan darvozani aniq nishonga oldi — 1:0. 83-daqiqada esa andijonliklarning navbatdagi hujumi paytida Muhammadkarim Toirov to‘pni boshi bilan darvozaga aniq yo‘naltirib, hisobni tenglashtirdi — 1:1.
O‘yinning asosiy vaqti shu hisob bilan yakunlandi va qo‘shimcha taymlar boshlandi. Ularning birinchi bo‘limida hisob o‘zgarmadi, biroq ikkinchi ekstra-taymda naq uchta to‘p kiritildi. So‘nggi daqiqadagi gol evaziga “Andijon” g‘alabani qo‘lga kiritdi va tarixida ilk bor O‘zbekiston kubogi egasiga aylandi—2:3.
“Daryo” ushbu dramatik tarzda kechgan o‘yindan fotogalereya tayyorladi.
Izoh (0)