“2024-yilda O‘zbekiston xalqi to‘ylarga salkam 12 mlrd dollar sarflab yuborgan” — tarixchi Baxtiyor Xolmurodov

O‘zbekistonda to‘ylar XIX asr tafakkuri bilan o‘tkazilmoqda. Bu haqda tarixchi olim Baxtiyor Xolmurodov YouTubeʼdagi chiqishida fikr bildirdi.

“Qurultoy” podkastida o‘zbeklar to‘yi bilan bog‘liq ijtimoiy muammolar tahlil qilindi. Baxtiyor Xolmurodovning aytishicha, to‘ylarga xarajatni kamaytirib, taʼlimga pul sarflash vaqti allaqachon kelgan.

“2014-yilda Fuqarolik jamiyatini monitoring qilish instituti bo‘lardi. O‘shanda ustozim Baxtiyor aka Isoqovdan maʼlumot olgandim. U kishi bir raqamni aytgandilar. Bu hammamizni ogohlikka chorlashi, o‘ylantirishdan tashqari tashvishlantirishi ham kerak. O‘sha yili Tojikistonning yalpi ichki mahsuloti taxminan 10 milliard dollar atrofida bo‘lgan. O‘zbekiston xalqi xuddi shu yili to‘ylarga 7,5 milliard dollarni sarflab yuborgan. Bu 2014-yildagi maʼlumot. 2024-yildagi maʼlumotni ham ustozimdan oldim. To‘y xarajatlari salkam 12 milliard dollarga qarab ketgan. Yaʼni juda katta raqamlar. Buning tagida inson taqdiri yotipti. To‘ydan iqtisod qilingan pullarni taʼlimga sarflash, bunga jiddiy qarash fursati keldi. Sababi XXI asrda XVI yoki XIX asr tafakkuri bilan yashab bo‘lmaydi. Alixonto‘ra Sog‘uniyning: ‘Agar o‘zbeklar har qanday ishga ertalab oshga borgandek birlashganda edi, bulardan buyuk millat bo‘lmasdi’, degan fikrlari bor edi. Buning tagida juda katta maʼno mujassam”, dedi mutaxassis.

Avvalroq “Amerika ovozi” teleradiosi jurnalisti Navbahor Imomova Amerikadagi o‘zbekistonliklarda ham pulni ayamaslik, keraksiz narsalarga sarflash odati borligini aytgandi.