O‘zbekiston Superligasining so‘nggi, 26-turidan o‘rin olgan bahsda Namanganning “Navbahor” klubi o‘z maydonida Andijonning “Andijon” jamoasini qabul qildi.
Vodiy derbisi maqomi, mezbonlarda O‘zbekiston kubogi finalidagi mag‘lubiyat uchun revansh olish va sovrinli o‘rinlarga daʼvogarlik qilish imkoniyati tufayli ushbu o‘yinga qiziqish yuqori bo‘ldi. Sevimli jamoasini qo‘llab-quvvatlash uchun Andijondan ham ko‘plab muxlislar keldi.
Keskin bellashuvlarga boy o‘tgan o‘yinda hisobni ochish mehmonlarga nasib etdi. 52-daqiqada esa andijonliklar jarima maydonchalarida Jamshid Boltaboyevga nisbatan qo‘pollik ishlatdi va Jamshid Iskanderov penaltini aniq amalga oshirib, hisobni tenglashtirdi.
O‘yinning 58-daqiqasida Yovan Jokich “Navbahor”ni hisobda oldinga olib chiqdi, 61-daqiqada esa Rustam Turdimurodov andijonliklarning navbatdagi hujumini samarali yakunlab, hisobni 2:2 ko‘rinishiga keltirdi.
71-daqiqada Islom Mamatkazin to‘pni “Navbahor” darvozaboni Eldor Suyunovning ustidan oshirib, darvozaga yo‘lladi va andijonliklar yana tashabbusni qo‘lga oldi.
Uchrashuvning 2-bo‘limiga to‘xtalishlar uchun 6 daqiqa qo‘shib berildi. 90+6-daqiqada Jamshid Iskanderovning jarima zarbasidan so‘ng Ruslanbek Jiyanov to‘pni boshi bilan darvozaga aniq yo‘llab, hisobni tenglashtirdi — 3:3.
Shu tariqa, “Navbahor” klubi “Andijon”dan revansh olish imkoniyatini boy bergan bo‘lsa-da, o‘zi uchun o‘ta muhim durangni qayd etdi va Superliganing bronza medaliga ega bo‘ldi.
“Daryo” ushbu o‘yindan fotogalereya tayyorladi.
Izoh (0)