Ўзбекистон Суперлигасининг 3-туридан ўрин олган баҳсда Наманганнинг “Навбаҳор” жамоаси ўз майдонида “Андижон”ни қабул қилди. “Водий дербиси” доим кескин ва муросасиз курашлар остида кечган, ушбу беллашув ҳам бундан мустасно бўлмади. Ўйинда эмоциялар, майдондан четлатишлар, автоголлар, футболчилар ўртасида даҳанаки жанглар, бир сўз билан айтганда, барчаси юз берди.
Ўйиннинг 2-дақиқасидаёқ Сергей Лушан шогирдлари стандарт вазиятдан сўнг ҳисобни очишга муваффақ бўлди. Бироқ наманганликларнинг қувончи узоққа чўзилмади. Орадан 4 дақиқа ўтар-ўтмас, меҳмонлар ҳисобни тенглаштирди. Машуковнинг дарвоза томон йўллаган тўпини мезбонларнинг бразилиялик ҳимоячиси Гильерме Гедеш кутилмаганда ўз дарвозасига киритиб қўйди – 1:1.
Иккинчи 45-дақиқаликни ҳужумкор тарзда бошлаган “лочинлар”нинг 51-дақиқадаги ҳужуми гол билан якунланди. Шоҳмалик Комиловнинг узатмасини Аббос Ғуломов самарали тарзда якунлаб, “Навбаҳор”ни яна ҳисобда олдинга олиб чиқди – 2:1.
Учрашувнинг 72-дақиқасида Шоҳмалик Комиловга нисбатан қўполлик ишлатгани боис андижонликларнинг босниялик ярим ҳимоячиси Мирзад Механович майдондан четлатилди. Натижада “бургутлар” майдонда 10 киши бўлиб қолди.
Учрашувнинг асосий вақтига ҳакам томонидан қўшиб берилган дақиқалар давом этаётган пайтда “Навбаҳор” ҳимоячиси Саидазамат Мирсаидов иккинчи марта огоҳлантирилиб, майдондан четлатилди ҳамда мезбонлар ҳам майдонда бир киши кам бўлиб қолди.
“Андижон” 90+8-дақиқада стандарт вазиятдан сўнг мувозанатни тиклади. Ислом Маматказиннинг зарбасидан сўнг тўп нигериялик ярим ҳимоячи Бенжамин Тейдига теккан ҳолда дарвоза тўридан жой олди – 2:2. Шу тариқа “водий дербиси”да жанговар дуранг қайд этилди.
“Дарё” “Навбаҳор” ва “Андижон” жамоалари ўртасидаги ўйиндан фотогалерея тайёрлади.
Изоҳ (0)