Vengriya kompaniyasi bilan hamkorlikda O‘zbekistonda avtomobil butlovchi qismlarini ishlab chiqarish masalasi muhokama qilindi.
Xabar qilinishicha, Shavkat Mirziyoyevning 3—4-oktabr kunlari Vengriyaga amalga oshirgan rasmiy tashrifi doirasida o‘tkazilgan oliy darajadagi muzokaralar chog‘ida erishilgan kelishuvlar ijrosini muhokama qilish maqsadida O‘zbekistonning Vengriyadagi elchisi Abat Fayzullayev Budapesht shahrida Vengriyaning avtomobilsozlik sanoatida yuqori texnologik ehtiyot qismlarini ishlab chiqaruvchi Raba Automotive Holding Plc. kompaniyasi bosh ijrochi direktori Bela Xetsman bilan muzokaralar o‘tkazdi.
Suhbat davomida Bela Xetsman O‘zbekiston Markaziy Osiyo mintaqasida kuchli avtomobilsozlik va qishloq xo‘jaligi mashinasozligi sanoatiga egaligi, UzAuto kompaniyasi bilan o‘zaro manfaatli hamkorlikni yo‘lga qo‘yish Vengriya kompaniyasi uchun katta ahamiyatga egaligini ta’kidladi.
2022-yil 4-oktabr kuni Raba Automotive Holding, UzAuto va O‘zbekistonning To‘g‘ridan-to‘g‘ri investitsiyalar jamg‘armasi o‘rtasida memorandum imzolangan bo‘lib, unda tomonlar avtomobillar uchun g‘ildirak o‘qlari va shassi butlovchi qismlarini yetkazib berish, ularni ishlab chiqarishni mahalliylashtirish bo‘yicha hamkorlik qilishlari belgilangan.
Ushbu masalani batafsil muhokama qilish va hamkorlikning keyingi bosqichlarini belgilab olish uchun Bela Xetsmanning 10—11-noyabr kunlari Turkiy davlatlar tashkiloti sammitida ishtirok etuvchi Vengriya delegatsiyasi tarkibida Samarqand shahriga tashrifini amalga oshirishga kelishildi.
Shuningdek, uchrashuv davomida 10-noyabr kuni Samarqand shahrida o‘tkaziladigan O‘zbekiston–Vengriya biznes-forumida ishtirok etish hamda mahalliy hamkorlar bilan tegishli investitsiya loyihalarini muhokama qilish uchun ikki tomonlama uchrashuvlar tashkil etish reja qilindi.
125 yildan ortiq tajribaga ega bo‘lgan Raba Automotive Holding Plc. kompaniyasi jahon avtomobil bozori uchun qishloq xo‘jaligi texnikasi, avtotransport vositalari uchun g‘ildirak o‘qlari va boshqa shassi butlovchi qismlarini ishlab chiqarishga ixtisoslashgan yirik kompaniyalaridan biri hisoblanadi. Kompaniya o‘z mahsulotlarini Yevropa Ittifoqi, Shimoliy Amerika va MDH mamlakatlariga eksport qiladi.
Izoh (0)