O‘zbekistonning yangi tayinlangan Favqulodda va muxtor elchisi Abat Fayzullayev 30-sentabr kuni Avstriya prezidenti Aleksandr Van der Bellenga ishonch yorliqlarini topshirdi, deb xabar bermoqda “Dunyo” AA.
Marosim “Hofburg” saroyida bo‘lib o‘tgan. Tadbirda Avstriya prezidentining tashqi siyosat va harbiy masalalar bo‘yicha maslahatchilari, Tashqi ishlar vazirligi bosh kotibi va boshqa rasmiy shaxslar ishtirok etgan.
“Suhbat chog‘ida Prezident Aleksandr Van der Bellen Avstriya tomoni Prezident Shavkat Mirziyoyev rahbarligida O‘zbekistonda amalga oshirilayotgan izchil o‘zgarishlar va keng ko‘lamli islohotlardan yaxshi xabardorligini ta’kidladi. So‘nggi yillarda Yevropa va butun dunyoda O‘zbekistonning obro‘si oshib bormoqda.
Prezident Avstriya—O‘zbekiston munosabatlarining bugungi ijobiy dinamikasini yuqori baholar ekan, savdo-investitsiyaviy va madaniy-gumanitar sohalardagi o‘zaro hamkorlikni yanada takomillashtirish zarurligiga alohida to‘xtaldi”, — deyiladi xabarda.
Eslatib o‘tamiz, 2020-yil 19-avgust kuni elchi Abat Fayzullayev Avstriya Tashqi ishlar vazirligiga ishonch yorliqlari nusxalarini topshirgan edi. Diplomatik protokolga ko‘ra, O‘zbekiston elchisi Avstriya prezidentiga ishonch yorliqlarining asl nusxasini taqdim etgan paytdan boshlab o‘z vazifalarini bajarishga to‘liq kirishgan hisoblanadi.
Abat Fayzullayev 29-iyul kuni Oliy Majlis Senati Kengashining qarori bilan O‘zbekistonning Avstriyadagi elchisi etib tayinlangandi. Tayinlovdan oldin Abat Fayzullayev vazirning yordamchisi – Tashqi ishlar vazirligining tashkiliy va nazorat bo‘limi boshlig‘i bo‘lib ishlagan.
Abat Fayzullayev O‘zbekistonning Avstriyadagi sobiq elchisi, O‘zbekistonning Yevropada xavfsizlik va hamkorlik tashkiloti hamda Venadagi boshqa xalqaro tashkilotlardagi doimiy vakili Sherzod Asadovning o‘rnini egallaydi. Sherzod Asadov shu yilning mart oyida tashqi ishlar vazirining o‘rinbosari etib tayinlangan edi.
Izoh (0)