Avstriya poytaxti Vena shahrida diplomatik kadrlar tayyorlash sohasidagi hamkorlik masalalari muhokama qilindi. Bu haqda “Dunyo” axborot agentligi xabar bermoqda.
Uchrashuv avvalida Emil Briks Jahon iqtisodiyoti va diplomatiya universiteti faoliyatini takomillashtirish yo‘lida amalga oshirilgan o‘zgarishlar bilan atroflicha tanishtirildi. Xususan, prezidentning “Jahon iqtisodiyoti va diplomatiya universiteti faoliyatini tizimli isloh qilish chora-tadbirlari to‘g‘risida”gi qarori mazmun-mohiyatiga alohida e’tibor qaratildi.
Muloqot chog‘ida mazkur hujjatdan kelib chiqqan holda Jahon iqtisodiyoti va diplomatiya universiteti dars jarayonlariga Vena Diplomatiya akademiyasi xodimlarini jalb qilish, shuningdek, universitet o‘qituvchi-professorlari malakasini oshirish uchun xorijiy ekspertlar ishtirokida mahorat darslarini tashkil qilish masalasi ko‘rib chiqildi.
O‘z navbatida, Emil Briks o‘zaro tajriba almashish maqsadida Jahon iqtisodiyoti va diplomatiya universiteti vakillarining VDAga tanishuv tashrifini amalga oshirishni taklif qildi. Shu bilan birga, o‘zaro talabalar almashuvi dasturlarini yo‘lga qo‘yish orqali Jahon iqtisodiyoti va diplomatiya universitetining bakalavr, magistr va doktorantura yo‘nalishidagi izlanuvchilari va mustaqil tadqiqiotchilar uchun Vena Diplomatiya akademiyasida malaka oshirishlari imkoniyatini yaratish masalasi ham muhokama qilindi.
Ma’lumot uchun, 1754-yilda tashkil etilgan Vena Diplomatiya akademiyasi (Diplomatische Akademie Wien) dunyodagi eng ko‘hna diplomatiya maktabi hisoblanadi. Talabalarni o‘qitishning asosiy yo‘nalishlari — xalqaro munosabatlar, siyosatshunoslik, jahon iqtisodiyoti, tarix, shuningdek, xalqaro huquq va Yevropa Ittifoqi huquqi.
Izoh (0)