O‘zbekiston va Vengriya o‘zaro hamkorlikda kino suratga olish rejalarini muhokama qildi. Bu haqda “Dunyo” xabar bermoqda.
Qayd etilishicha, elchixona ko‘magida O‘zbekiston va Vengriyaning kino sanoati uchun mas’ul bo‘limlari o‘rtasida onlayn uchrashuv tashkil etildi. Unda “O‘zbekkino” milliy agentligi direktori Firdavs Abduxoliqov, Vengriya hukumatining milliy kino sanoatini rivojlantirish bo‘yicha komissari va Milliy kino instituti direktori Chaba Kael hamda O‘zbekiston elchisi Abat Fayzullayev ishtirok etdi. Muloqot chog‘ida hamkorlikda kino suratga olish va madaniy tadbirlarni tashkil etish masalalari muhokama qilindi.
Chaba Kael o‘zbekistonlik hamkorlar bilan kino sanoati sohasida hamkorlik qilishdan manfaatdor ekanini bildirdi va “ikki xalqning tarixiy ildizlari mushtarak” ekanini ta’kidladi. U, ayniqsa, tarixiy janrdagi filmlarni suratga olish bo‘yicha hamkorlikda ish olib borish imkoniyatlarini ko‘rib chiqishga tayyor ekanini bildirdi. Vengriya vakili, shuningdek, O‘zbekistonning tarixiy qahramonlari haqida film suratga olinishi venger tomoshabinlariga o‘zbek xalqining tarixi va boy madaniyati bilan yaqindan tanishish imkonini berishini qayd etdi.
Uning aytishicha, Vengriya Yevropada kino ishlab chiqarish bo‘yicha Buyuk Britaniyadan keyin ikkinchi o‘rinda turadi. Kino sanoatini rivojlantirish va xorijiy kinokompaniyalarni jalb qilish uchun mamlakatda maxsus tartib mavjud bo‘lib, unga ko‘ra, Vengriyada film suratga olishda kinoijodkorlarning barcha xarajatlarining 30 foizini Vengriya Milliy kino instituti qoplash mumkin. Mamlakat dunyoning yetakchi kinokompaniyalarini o‘ziga tortadigan ko‘plab go‘zal manzaralar va o‘rta asr me’morchiligiga ega.
Chaba Kael 14–17-sentabr kunlari Toshkent va Samarqand shaharlarida bo‘lib o‘tadigan XIV Toshkent xalqaro kinofestivalida faxriy mehmon sifatida ishtirok etish taklifini qabul qildi.
Mavzuga doir:
Izoh (0)