Budapeshtda O‘zbekiston va Vengriya tashqi siyosat mahkamalari o‘rtasidagi hamkorlik rejalari muhokama qilindi, deb xabar bermoqda “Dunyo” axborot agentligi.
Qayd etilishicha, O‘zbekiston elchisi Abat Fayzullayev Vengriya Tashqi ishlar va savdo vazirligining sharqiy aloqalarni rivojlantirish bo‘yicha yangi tayinlangan davlat kotibi o‘rinbosari Adam Shtifter bilan uchrashgan. Unda istiqbolda ikki tomonlama tadbirlarni tashkil etish bilan bog‘liq masalalar muhokama qilingan.
Suhbat chog‘ida tomonlar so‘nggi yillarda O‘zbekiston–Vengriya munosabatlari barcha sohalarda sezilarli darajada mustahkamlangani, pandemiya davri bo‘lishiga qaramay, Vengriya tashqi ishlar vaziri Peter Siyrtoning 2020-yil boshidan buyon O‘zbekistonga oltita tashrifi tashkil etilgani shundan dalolat ekanini ta’kidlangan. Ayni paytda turli darajalarda, jumladan, eng yuqori darajada muntazam faol muloqot olib borilmoqda.
Ikki tomonlama munosabatlarni rivojlantirishdagi muhim bosqichlardan biri Vengriya bosh vaziri Viktor Orbanning 2021-yil mart oyida O‘zbekistonga rasmiy tashrifi amalga oshirilgani alohida ta’kidlandi. Mamlakatlar o‘rtasidagi ko‘p qirrali munosabatlar strategik sheriklikning sifat jihatidan yangi bosqichiga ko‘tarilgani holda savdo-iqtisodiy, sarmoyaviy, moliyaviy-texnologik va madaniy-gumanitar sohalarda ikki tomonlama aloqalar tobora mustahkamlanmoqda.
Uchrashuvda O‘zbekiston va Vengriya o‘rtasidagi hamkorlikning huquqiy asoslarini takomillashtirish maqsadida Tashqi ishlar vazirligining yuridik bo‘limlari o‘rtasida maslahatlashuvlar o‘tkazish masalalari ham muhokama qilindi.
Izoh (0)