O‘zbekiston va Birlashgan Vena instituti bilan kadrlarni tayyorlash va qayta tayyorlash sohasida hamkorlik qilishi kutilmoqda. Bu haqda “Dunyo” xabar berdi.
Xabarga ko‘ra, O‘zbekiston elchisi Abat Fayzullayev Vena shahrida Birlashgan Vena instituti (BVI) direktori Xerve Joli bilan uchrashdi. Xerve Joli so‘nggi yillarda O‘zbekistonda malakali kadrlar tayyorlashga qaratilayotgan eʼtibor BVI darajasida ham yaxshi samara berganini taʼkidladi. Uning aytishicha, 2000—2016-yillarda O‘zbekistondan kelgan ishtirokchilar soni o‘rtacha 60 nafarni tashkil qilgan bo‘lsa, 2017-yildan buyon bu ko‘rsatkich ikki barobarga ortib, 2022-yilda 125 nafarga yetdi.
Muloqot davomida respublika mutaxassislarining malakasini oshirish, imkon qadar ko‘proq xodimlarga imkoniyat yaratish maqsadida O‘zbekistonda BVI maxsus kurslarini tashkil etish masalasiga ham eʼtibor qaratildi.
Maʼlum qilinishicha, tomonlar uchrashuvda muhokama qilingan masalalar yuzasidan O‘zbekiston rasmiy tashkilotlari va BVI imkoniyatlaridan kelib chiqib, amaliy ishlarni boshlashga kelishib oldi.
Maʼlumot uchun, BVI Markaziy, Sharqiy va Janubi-Sharqiy Yevropa, Kavkaz va Markaziy Osiyo mintaqasidagi 31 ta davlatda davlat xizmatchilarini qayta tayyorlash va ularning malakasini oshirishni qo‘llab-quvvatlovchi muassasa hisoblanadi. Ushbu muassasa bugungi kunga qadar 49 mingdan ortiq davlat xizmatchilarini qayta tayyorlashga yordam berdi. Institutda makroiqtisodiy siyosatni ishlab chiqish va boshqarish, pul-kredit siyosati va valyuta kursi tizimini takomillashtirish, moliya sektori barqarorligini taʼminlash, tashqi qarz siyosatini amalga oshirish, soliq siyosati va davlat xarajatlarini boshqarish bo‘yicha turli kurs hamda treninglar tashkil etilmoqda.
Avvalroq O‘zbekistonda Koreya universiteti taʼlim standartlari asosida shifokor va hamshiralar tayyorlash yo‘lga qo‘yilishi xabar qilingandi.
Izoh (0)