Shveysariyalik diplomat Pyer fon Arks YXHTning O‘zbekistondagi loyihalari koordinatori idorasining yangi rahbari etib tayinlandi. Bu haqda “Dunyo” agentligi xabar berdi. Diplomat yangi vazifasini bajarishga 2021-yil may oyida kirishadi.
Ma’lum qilinishicha, 24-aprel kuni O‘zbekistonning Yevropada xavfsizlik va hamkorlik tashkilotidagi (YXHT) doimiy vakili, elchi Abat Fayzullayev shveysariyalik diplomat Pyer fon Arks bilan onlayn-muloqot o‘tkazgan.
O‘zbekiston elchisi Pyer fon Arksni yuqori lavozimga tayinlangani bilan tabriklagan, uning barcha bilim va tajribasi mamlakatning YeXHT bilan o‘zaro aloqalarini yanada mustahkamlash va rivojlantirishga hissa qo‘shishiga umid bildirgan.
O‘z navbatida, Pyer fon Arks so‘nggi yillarda O‘zbekistonning ijtimoiy-siyosiy va sotsial-iqtisodiy hayotida amalga oshirilayotgan ijobiy o‘zgarishlarni, YXHT va O‘zbekiston o‘rtasidagi izchil rivojlanib borayotgan munosabatlarni yuqori baholagan.
Ma’lumot uchun, Pyer fon Arks YXHTning Bishkekdagi Dastur byurosiga rahbarlik qilib kelayotgan edi. 2006—2016-yillarda u Shveysariyaning YeXHT huzuridagi missiyasida maslahatchi, so‘ngra Doimiy vakil o‘rinbosari lavozimlarida ishlagan.
Eslatib o‘tamiz, 2016-yilning mayidan buyon YeXHTning O‘zbekistondagi loyihalari koordinatori idorasi rahbari sifatida Jon MakGregor faoliyat ko‘rsatib kelayotgandi. Ta’kidlanishicha, u YXHTning Turkmanistondagi missiyasi rahbari lavozimiga tayinlangan.
Avvalroq O‘zbekiston Prezidenti Administratsiyasi rahbarining o‘rinbosari Sherzod Asadov Yevropada xavfsizlik va hamkorlik tashkilotining O‘zbekistondagi loyihalari koordinatori, elchi Jon MakGregor bilan uchrashib, unga Shavkat Mirziyoyevning minnatdorlik maktubini o‘qib eshittirgandi.
Suhbatda Jon MakGregorning O‘zbekistondagi faoliyati samarali bo‘lgani, hamkorlikda ko‘plab loyihalar amalga oshirilgani ta’kidlangan. Tajribali diplomatning kelgusi ishlariga muvaffaqiyat tilab, ezgu istaklar bildirilgan.
Izoh (0)