O‘zbekistonning Avstriyadagi elchixonasida Namangan viloyati delegatsiyasi nomidan qabul uyushtirildi. Bu haqda “Daryo” muxbiri Azizbek Abduvaliyev xabar bermoqda.
Qabul davomida Namangan viloyati hokimi Shavkat Abdurazzaqov boshchiligidagi delegatsiya Avstriya tadbirkorlari bilan uchrashdi. O‘zbekistonning Avstriyadagi favqulodda va muxtor elchisi Abat Fayzullayev ham tadbirda ishtirok etdi va so‘zga chiqdi.
Uchrashuvda Namangan viloyatining savdo-iqtisodiy, ijtimoiy-gumanitar, turizm va sport salohiyati taqdimoti bo‘lib o‘tdi. Shuningdek, viloyatda joriy yil 22-maydan 5-iyunga qadar bo‘lib o‘tadigan 61-xalqaro gullar festivali to‘g‘risidagi videolavha namoyish etildi.
Qabul davomida Namanganda ishlab chiqarilgan mahsulotlar ko‘rgazmasi bo‘lib o‘tdi. Mehmonlarga namangancha tayyorlangan palov tortildi.
Shavkat Abdurazzaqov Siemens kompaniyasining Avstriyadagi shtab-kvartirasida ham bo‘ldi.
Bu yerda kompaniya rahbariyati bilan muzokaralar o‘tkazilib, o‘zaro hamkorlikni yanada rivojlantirish masalalari muhokama qilindi.
Namangan delegatsiyasining Avstriyaga safari davom etmoqda.
Izoh (0)