Avstriyada o‘zbek qovuni, Farg‘ona holvasi va boshqa qishloq xo‘jaligi mahsulotlarining birinchi ko‘rgazmasi bo‘lib o‘tdi

Avstriyaning Vena shahrida O‘zbekiston qishloq xo‘jaligi mahsulotlarining birinchi ko‘rgazmasi bo‘lib o‘tdi. 

Venada O‘zbekiston qishloq xo‘jaligi mahsulotlari ilk bor namoyish etildi. Tadbirdan ko‘zlangan asosiy maqsad, O‘zbekistonning agrar, eksport va sayyohlik salohiyatini namoyon etish, avstriyalik tadbirkorlarni “Made in Uzbekistan” brendi bilan tanishtirish bo‘ldi.

Ko‘rgazmada O‘zbekiston Iqtisodiyot vazirligi, Avstriya Tashqi ishlar vazirligi, Federal iqtisodiy palata, Vena shahrida akkreditatsiyadan o‘tgan xalqaro tashkilotlar, mezbon davlat ishbilarmon doiralari vakillari, shuningdek, Vena shahrida istiqomat qilayotgan vatandoshlar ishtirok etdi. 

Tadbirda Avstriyaning Rewe Group, Billa, Spar Group, Metro kabi yetakchi importyor-kompaniyalari va boshqa savdo tarmoqlari vakillaridan iborat jami 100 dan ziyod kishi ishtirok etdi.

O‘zbekiston elchisi Abat Fayzullayev forum ishtirokchilariga O‘zbekiston eksportyorlarining afzalliklari haqida ma’lumot berdi. 

Ushbu maqomga ega bo‘lish O‘zbekistondan Yevropa Ittifoqi mamlakatlariga 6 200 xil tovarlarni eksport qilish imkonini beradi.

O‘zbekiston stendida Yevropa Ittifoqi bozoridagi eng ommabop qishloq xo‘jaligi mahsulotlari namoyish etildi. 

Jumladan, mayiz, yong‘oq, o‘rik, quritilgan o‘rik, quritilgan olma, tut singari mevalar, bodring, lavlagi, sabzi, shuningdek, Xorazm va Sirdaryo viloyatlarida yetishtiriladigan qovun  namoyish etildi.

Bundan tashqari, ko‘rgazmada Avstriya bozori uchun yangi bo‘lgan mahalliy mahsulotlar — holva (Farg‘ona), bio-qurt (turli xili), lakritsa (qizilmiya ildizi) va mahalliy uzum navlaridan vinolar namoyish etildi.

O‘zbekistonda yetishtirilgan mahsulotlar taqdimoti doirasida o‘zbek qovunining Yevropa bozorida tobora ommalashib borayotgani alohida qayd etildi. 

So‘nggi yillarda Buyuk Britaniya, Chexiya, Litva, Niderlandiya, Shvetsiya va Gretsiya mamlakatlari o‘zbek qovuni importini ko‘paytirmoqda. 2021-yilda Latviya 2,6 ming tonna va Germaniya 861 tonna qovun import qilgan.

Avvalroq O‘zbekistonda sariq rangli tarvuz yetishtirilayotgani haqida xabar berilgan edi.