Sara Uolsh Yangi Zelandiyaning O‘zbekistondagi elchisi etib tayinlandi. Bu haqda O‘zbekiston TIV rahbari Baxtiyor Saidov o‘zining Telegram kanali orqali ma’lum qildi.
Qayd etilishicha, O‘zbekiston tashqi ishlar vaziri Sara Uolsh bilan uchrashib, undan ishonch yorliqlarini qabul qilib olgan.
“Samarali hamkorlik uchun innovatsion qishloq xo‘jaligidan tortib yashil energiyagacha bo‘lgan ko‘plab yangi va istiqbolli yo‘nalishlarni o‘rganish orqali mamlakatlarimiz o‘rtasidagi uzoq masofani qisqartirish yo‘llarini muhokama qildik. Elchi xonimga ikki tomonlama munosabatlarimizdagi ulkan salohiyatni ro‘yobga chiqarishga qaratilgan faoliyatida muvaffaqiyatlar tilaymiz”, — deb yozadi Baxtiyor Saidov.
Avvalroq O‘zbekistonning yangi tayinlangan elchisi Abat Fayzullayev Italiya prezidenti Serjo Mattarellaga ishonch yorliqlarini topshirgani, O‘zbekistonning Ispaniyadagi elchisi missiyasini yakunlayotgani, O‘zbekistonning Buyuk Britaniyadagi yangi elchisi tayinlangani to‘g‘risida xabar berilgandi.
Izoh (0)