O‘zbekistonning Vengriyadagi elchisi Abat Fayzullayev Budapesht shahrida qishloq xo‘jaligi va oziq-ovqat ishlab chiqarish bo‘yicha mamlakatning yetakchi kompaniyalaridan biri — “Bonafarm Group” bosh ijrochi direktori Attila Chani bilan muzokaralar o‘tkazdi, deb xabar bermoqda “Dunyo” axborot agentligi.
Qayd etilishicha, uchrashuv chog‘ida Toshkent viloyatining Ohangaron tumanida qo‘shma parrandachilik klasterini tashkil etish masalalari muhokama qilingan.
Attila Chani O‘zbekistonda parrandachilik jabhasi istiqbolli sohalardan biri ekanini qayd etdi. Uning aytishicha, parranda go‘shti eng arzon oqsil manbalaridan biri bo‘lib, hozirgi kunda O‘zbekiston aholisi sonining tez o‘sayotgani parranda go‘shti iste’moliga bo‘lgan ehtiyojni ham sezilarli darajada oshirmoqda. Tahlil natijalariga ko‘ra, talabni qondirish uchun O‘zbekistonda yaqin 10 yil ichida har biri yiliga 60 million tovuq go‘shti ishlab chiqarish quvvatiga ega bo‘lgan ikkita yirik parranda go‘shtini qayta ishlaydigan zavod tashkil qilish mumkin.
Bu masala Vengriyaga amalga oshirilgan oliy darajadagi tashrif arafasida O‘zbekiston qishloq xo‘jaligi vaziri Aziz Voitov bilan muhokama qilingani va o‘zbek tomonidan Toshkent viloyati Ohangaron tumanida parrandachilik klasterini tashkil etish loyihasi ilgari surilgani ta’kidlangan.
“Bonafarm Group” kompaniyasi bosh ijrochi direktori mazkur loyihaga qiziqish bildirgan holda uni amalga oshirish imkoniyatlarini batafsil o‘rganish uchun yaqin kunlarda kompaniyaning ishchi guruhi O‘zbekistonga amaliy safari bilan borishini ma’lum qildi.
“Bonafarm Group” kompaniyasi 2009-yilda tashkil etilgan bo‘lib, qishloq xo‘jaligi va oziq-ovqat mahsulotlari, jumladan, chorvachilik, vinochilik, yem-xashak yetishtirish, go‘sht-sut mahsulotlari ishlab chiqarish bilan shug‘ullanadigan yetakchi korxonalarni birlashtirgan. Kompaniya aktivlari miqdori 1,9 milliard dollarni, tovar aylanmasi esa 805 million dollarni (2021-yil) tashkil etadi. Hozirgi paytda kompaniya korxonalarida 8 ming 400 nafar xodim mehnat qilmoqda.
Izoh (0)