Surxondaryo viloyatida Muzrabot tumanida ayoliga tazyiq o‘tkazgan erkak qamaldi. Bu haqda “Hudud” dasturida xabar berildi.
Ma’lum qilinishicha, Muzrabot tumanida yashovchi ayol turmush o‘rtog‘ining tazyiqi ostida qolgan. Shu sababli Ichki ishlar bo‘limi tomonidan 28-fevral kuni unga himoya orderi berilgan.
Shunga qaramay 49 yoshli erkak ayolini yana do‘pposlagan. 14-mart kuni spirtli ichimlik iste’mol qilgan erkak puli yetmagani sababli turmush o‘rtog‘ining telefonini do‘konga 15 ming so‘m evaziga garovga qo‘ygan. Uyga qaytgach esa ayoliga tazyiq o‘tkazgan.
Holat Jinoyat ishlari bo‘yicha Muzrabot tuman sudida ko‘rib chiqildi. Sud hukmi bilan erkakka Ma’muriy javobgarlik to‘g‘risidagi kodeksga asosan 10 sutka qamoq jazosi tayinlandi.
Sirdaryo viloyatining Guliston shahrida yashovchi ayol eri tomonidan ayovsiz kaltaklangani, sochi kalga olingani haqida xabar berilgandi. Sud hukmi bilan aybdor erkak 2 yil 6 oyga ozodlikdan mahrum qilindi.
Endi oilaviy zo‘ravonlikdan jabrlangan shaxsning talabiga ko‘ra sud tomonidan yarashish uchun muhlat tayinlanmaydi.
Amaldagi qonunchilikka ko‘ra oiladagi tazyiq va zo‘ravonlik sabab sudga ariza bilan murojaat qilinganda sud er-xotinni yarashtirish uchun muayyan muhlat beradi. Ushbu berilgan muhlat ichida oilaviy nizo va janjallar qayta sodir etilishi ayollarning o‘z joniga qasd qilishiga, ularga yetkazilgan tan-jarohatlari esa ularning bevaqt o‘limiga sabab bo‘lmoqda.
Qonun bilan amaliyotga joriy etilishi kutilayotgan normalarga asosan sud ishni ko‘rishni keyinga qoldirilmay o‘z vaqtida qaror qabul qiladi, bu nizoli oilalarda muntazam zo‘ravonlik holatlari va og‘ir jinoyatlar sodir etilishining oldini oladi.
Xususan, oilaviy zo‘ravonlikdan jabrlangan shaxsning talabiga ko‘ra sud tomonidan yarashish uchun muhlat tayinlamaslik nazarda tutilmoqda.
Izoh (0)