“Milliy taklanish” demokratik partiyasi raisi Alisher Qodirov Otalar kunini jiddiy siyosiy-ijtimoiy kun sifatida ommalashtirishni taklif etdi.
“Otalar tog‘ bo‘lardi. Bugun zo‘ravon, nomussiz, alimentdan qochib yuradigan, xotinboz va hokazo… Nafaqat oilada, butun jamiyatda erkakni, ya’ni amaldagi yoki bo‘lajak otalar ohorini to‘kib, nomini oyoqosti qilib yubormayapmizmi? Buning oqibati nima bo‘ladi?” — deydi deputat.
Alisher Qodirovning so‘zlariga ko‘ra, bugungi oila buzilishlarining asosiy sababi yoshlar birgalikda sabr bilan o‘tishlari kerak bo‘lgan muammolar, lekin tomonlar bir-biriga ichonchini yo‘qotmoqda. Muvozanatli murosa, oqibati halovot va maʼrifatli farzandlar bo‘lgan milliy oila madaniyati, otalarni rad etayotgan, erkak-ayol munosabatlarida inqirozga tushib qolgan madaniyatlar taʼsirida qolib ketayotgandek.
Bog‘cha va maktabni erkak tarbiyachi va o‘qituvchilar tashlab ketganiga ancha bo‘ldi. So‘nggi yillarda erkaklar oiladan ham siqib chiqarilayotgandek.
“Millat taqdiri quriladigan bu maskanlar rad etilayotgan otalikning achchiq mevalari — asabiy ayollarning eʼtirozlari bilan bo‘g‘ilmayaptimi? Nega onalar, tarbiyachi va o‘qituvchi ayollar bu qadar asabiy?” — deydi Alisher Qodirov.
Uning bildirishicha, ahmoq hamma millatda topiladi, ikkita zo‘ravon, tarbiyasizni bosh sahnaga chiqarib, o‘zbek erkaklari hammasi zo‘ravon, ayolini xor qiladi degan qarashlarni yoshlarga singdirilishi oqibati yaxshi bo‘lmaydi.
“Ota, erkak — jamiyat shaʼni shavkatini himoyachisi! Mukarram va hikmatli onalar bu himoyachilarni tarbiyalovchilardir!”, — deb ta’kidladi deputat.
“Milliy taklanish” demokratik partiyasi raisining ma’lum qilishicha, saylov dasturida farzand ko‘rgan ayollarga tarbiya treninglarida ishtirok etish sharti bilan 3 yilgacha haq to‘lanadigan onalik taʼtili berish taklifi ustida ishlanmoqda.
“Agar onalar shavkatli farzandlar uchun halovatidan kechmasa, otasini tanimaydigan farzandlar nafaqat onasi, balki butun jamiyatni nafsiga qurbon qiladi”, — dedi Alisher Qodirov.
Deputat oila munosabatlari jiddiy tadqiq qilinishi kerakligini, bu milliy taraqqiyotni taʼminlashga xizmat qiladigan muhim xulosalarga olib kelishini qayd etdi.
Ma’lumot uchun, ayni paytda dunyoning 30 dan ortiq davlatlarida Otalar kuni turli sanalarda, xususan, Qozog‘istonda iyun oyining uchinchi yakshanbasida, Rossiyada oktyabr oyining uchinchi yakshanbasida nishonlanadi.
Izoh (0)