21-avgust sanasida xonanda Shahnoza Otaboyeva 35 yoshni qarshi oldi. U muxlislarga “Oh, azizim”, “Farishtam onam” kabi qo‘shiqlari bilan yaxshi tanish.
![](/static/2024/08/21/photo_2024-03-11_11-14-12-1L0r9PpH-R11F3YCV.jpg)
— Aslida, kelib chiqishimiz Toshkent viloyatining Piskent tumaniga borib taqaladi. Lekin buvim Surxondaryoda katta shifokor bo‘lgani uchun ota-onam Surxondaryoda yashashgan va men o‘sha yerda tug‘ilganman. Lekin bolaligim Toshkentda o‘tgan. Onam chiroyli qo‘shiqlar aytadilar, lekin o‘zlari o‘qituvchilar. San’atga qiziqish onamdan o‘tgan. Agar shifokor bo‘lganimda, eplab ketardim, deb o‘ylayman. Yoki xonanda bo‘lmaganimda, yaxshi tikuvchi bo‘lardim. “Oh, azizim” klipidan keyin meni styuardessalikka ham ishga taklif qilishgan. Bunga bo‘yim uzunligi sabab bo‘lgan bo‘lsa kerak.
Bolalik xotiralari
— Maktabda onamning qo‘llarida tahsil olganman. Hech esimdan chiqmaydi. O‘sha paytlarda farrosh uchun sinf fondiga pul yig‘ilardi. Onam sinf rahbari bo‘lgani uchun farrosh chaqirmay, darsdan keyin o‘zlari sinf xonalarini tozalab chiqardilar. Men ham shunda onamga yordam berardim. Ta’til paytlarida uyda bekor qolmasin, deb “dom”imiz tagida kichkina stolcha qo‘yib, pista va qurt sotishimga sharoit qilib berardi. Mehnatning aybi yo‘q. Keyinchalik kliplarim televideniye orqali namoyish etila boshlaganidan so‘ng qo‘shnilarim “Anov pista-qurt sotadigan qo‘shni qiz artist bo‘libdi”, deyishgan ekan. Onam ukam ikkalamizni yolg‘iz boshi bilan voyaga yetkazganlar.
Ozoda Nursaidovaga havas qilganman
— “Oh, azizim”ni Ozoda Nursaidovaga o‘xshab kuylaganman. O‘sha qo‘shiq chiqqanidan keyin ko‘pchilik Ozoda yangi qo‘shiq aytibdi, deb o‘ylashgan. Ozoda opamga taqlid qilib-qilib, o‘zimni topganman. Chunki men Ozoda bo‘la olmasdim, o‘z yo‘nalishimni topishim kerak bo‘lgan. Ular menga nafaqat ustoz, balki yaqin opamdek bo‘lib qolganlar.
Aktyor Kamol Bobonazarov bilan turmushi
![](/static/2024/08/21/23421756_787106428146456_5331151168594771968_n-680x513-Ohbzjlxc-NuHLUiVm.jpg)
— Turmush o‘rtog‘im bilan to‘liq 3 yil yashadik. Keyin alohida yashadik. Bir yarim yildan keyin farzandlarimiz ota-onasiz o‘smasin, deb yana yarashdik. Lekin yashab keta olmadik. Hozirda qonunan ham, shar’iy tomondan ham ajrashganmiz. Hech qaysi ayol baxtli va to‘kis hayotda yashasa, u hayotini barbod qilib, boshqa yo‘lga ketmaydi. Men qiyinchilik ko‘rib katta bo‘lganman, farzandlarim ota-onasiz katta bo‘lishlarini istamaganman. Balki mening aybim — san’atkor bo‘lganimdadir. Chunki to‘ylar, xizmatlar sabab ko‘p ko‘chada yuramiz. Shu sabab o‘rtamizda kelishmovchiliklar bo‘ldi. Men uyda ham erkak, ham ayol bo‘lib yashashdan charchadim. Necha yillardan beri uyga faqat men bozorlik qilib kelaman. Men ham turmush o‘rtog‘im ro‘zg‘orimni qilib berishini xohlayman.
Ortiqcha vazn bilan kurash
Xonandaning aytishicha, uning hayotidagi stresslar va asabbuzarliklar ortiqcha vazn to‘plashiga sabab bo‘lgan.
— To‘ydan oldin birga ijod qilishni, xizmatlarga birga chiqib, men qo‘shiq aytib, ular boshlovchilik qilishlarini rejalashtirgandik. Ketma-ket farzand ko‘rdim. Ijodni ham oilam mustahkamlansin, deb tashlab qo‘ydim. To‘yga, xizmatlarga borib kelardim kerak bo‘lsa. Boshida ko‘p qiyinchiliklar bo‘ldi. Yaxshi bo‘lib ketar, deb kurashdim. 27 yoshimda turmushga chiqib, 28 va 29 yoshimda ketma-ket farzandli bo‘ldim. Asabbuzarlik va stresslardan semirib ketdim. Tarozidagi vaznim 120 kiloga qarab ketdi. Har xil diyetalar qildim, dorilar ichdim. Umuman oza olmadim. Oxiri oshqozonimni kestirib 45 kiloga ozdim.
![](/static/2024/08/21/photo_2022-07-23_19-38-52-535x600-535x600-lV4m7FRR.jpg)
Shahnoza Otaboyeva vazni sabab 5 yil sahnaga chiqmagani haqida
— Bu ishni hamma bildi, chunki men hech kimdan berkitib qilmadim. Birinchi navbatda yaxshi shifokor tanlay olish kerak ekan, sababi bu sizning hayotingiz bilan bog‘liq. Ko‘pchilik bilan maslahatlashdim. Ayol kishi farzand ko‘rgandan keyin baribir semiradi. Ayniqsa, COVID-19 dan keyin ko‘p o‘zgarishlar bo‘ldi, yashash uchun kurashdik. Ozarbayjondan kelgan shifokorga bordim va jarrohlik yo‘li bilan ozish uchun operatsiya qildirdim. O‘zimni juda yaxshi his qilyapman, chunki 5 yil sahnadan qochib yurgandim. Vaznim sababli klip ololmadim, sahnaga chiqolmadim. Ozish uchun hamma narsa qildim, foydasi bo‘lmadi.
![](/static/2024/08/21/maxresdefault-JiwZrRbv-tP3JAc3h.jpg)
Jarrohlik operatsiyasidan oldingi holati va undan keyin 35 kg vazn yo‘qotgani haqida
— Operatsiya qildirish haqida ko‘p ayollarga aytyapman. San’atkor bo‘lganingizdan keyin shu holat bo‘lsa, ko‘pchilikdan qochar ekansiz, odamlardan uyalarkansiz. Do‘konga kirishim bilan sizga mos o‘lchamdagi kiyim yo‘q deyishlari ko‘nglimga tegardi. Biror narsa tiktirsangiz, yarashmaydi, oynaga qaragingiz kelmaydi, bu to‘la vaznli ayollarimizda oddiy hol. Shunaqa voqealar bo‘lgan. Juda qiynaldim, stress bo‘ldi, bu holatni boshdan kechirgan odam biladi. Men 35 kg vazn tashladim, yaqinda borib shifokor ko‘rigidan o‘tgandim. Hozir o‘zimni juda yengil his qilyapman, xuddi 15 yil oldingi, klipimdagi styuardessa ko‘rinishida bo‘lgan Shahnozaga qaytgandekman. Bu reklama emas, o‘zim boshdan kechirganim uchun buni ko‘pchilikka tavsiya qildim. Ko‘pchilik Instagram sahifamda 5-6 oydan beri meni kuzatib keladi, ayrimlari xuddi shu jarrohlik operatsiyasini qildirdi va menga rahmat aytdi.
![](/static/2024/08/21/photo_2022-07-23_18-09-14-680x367-680x367-lrdDEjNF.jpg)
Ajrashishiga nima sabab bo‘lgan?
— Erkak o‘z ayolini benomuslikda, dilozorlikda ayblasa, oilasini uysiz qoldirsa chiday olmas ekansiz. Yashab o‘tirgan uyimizni sotib yuborgan, puli esa yo‘q bo‘lib ketgan. Mana shu narsalar meni kuchli qildi. Men o‘shanda ikki bolam bilan birovning “tarakanxonasida” yashadim. Mayli, uyni sotib yubording, lekin ayoling va bolalaringni ijaraga olib chiqish yo‘lini qilsang bo‘lardi-ku. Lekin turmush o‘rtog‘im kimnidir topib, meni to‘la holimda ikki bolam bilan shundoq botqoqqa uloqtirib ketdi. Yaqinda shunday holat bo‘ldi: bolam otamni sog‘indim, dedi. Telefon qilsak har doim “Ishim bor hozir, bolam” juda bo‘lmasa “Hozir pulim yo‘q, pulim bo‘lganida boraman”, deydi. Lekin keyinchalik eshitdimki, o‘shanda bir ayolning ofisida uni kutib o‘tirgan ekan.
Izoh (0)