Sirdaryo viloyatining Guliston shahrida yashovchi ayol eri tomonidan ayovsiz kaltaklangani, sochi kalga olingani haqida xabar berilgandi. Sud hukmi bilan aybdor erkak 2 yil 6 oyga ozodlikdan mahrum qilindi.
Ma’lum qilinishicha, fuqaro Q.B. N.E. (ayol)ning nikohi 2021-yilda bekor qilingan bo‘lsa-da, ayol erining taklifiga binoan 5 nafar farzandi bilan Guliston shahridagi xonadonlarning birida istiqomat qilgan. Shu vaqtda erkak shar’iy nikoh asosida boshqa ayolga uylangan va uni ham xonadoniga olib kelgan.
Erkak mast holatda telefon orqali begona erkaklar bilan yozishganini vaj qilib, ayolga ham ruhiy, ham jismoniy tazyiq o‘tkazgan.
“Daryo” bilan muloqotda bo‘lgan ayolning tanishi erkak maktabda jismoniy tarbiya o‘qituvchisi bo‘lib ishlashini, ayolini anchadan beri shu tarzda kaltaklab kelishini bildirgandi.
“Ammo hech qayerga shikoyat qilmaydi. Mening uyimga qochib kelgan kuni ham uch kun davomida bog‘lab qo‘yilganini, og‘zi skotch bilan o‘ralgan holda uch kun och qolganini, to‘rtinchi kuni amallab uydan qochib chiqqanini aytdi”, degandi suhbatdosh.
Holat yuzasidan sud ishi jinoyat ishlari bo‘yicha Guliston shahar sudida ko‘rib chiqildi. Sud hukmiga ko‘ra, erkak Jinoyat kodeksining 126 (ko‘p xotinli bo‘lish) va 126-1 (oilaviy (maishiy) zo‘ravonlik) moddalarida nazarda tutilgan jinoyatlarni sodir etganlikda aybdor deb topilgan va unga nisbatan 2 yil 6 oy muddatga ozodlikdan mahrum qilish jazosi tayinlandi.
Izoh (0)