Harper’s Bazaar moda jurnali Turkiyada o‘zining navbatdagi “Yil ayollari” marosimini o‘tkazdi. Mukofotlar turli nominatsiyalar bo‘yicha egalariga topshirildi.
Yil aktrisasi
Birje Akalay “Yil aktrisasi” deb topildi. Joriy yilda uning ishtirokida “Bir Cumhuriyet şarkısı” (“Respublika qo‘shig‘i”) filmi suratga olindi. Birje ekranda turk xalqining birinchi opera kuychisi Nimet Vohidaxonim rolini ijro etdi. Film turk xalqining otasi va bosh qahramoni hisoblangan Mustafo Kamol Otaturk hayotiga bag‘ishlangan, shuning uchun ushbu obraz e’tibordan chetda qolmagan.
Burje Akalay marosimga aktyor Hakan Kurtash bilan birga tashrif buyurdi. Kechada u turkiyalik dizayner Özgür Mazur brendiga mansub qizil libosda bo‘ldi.
Digital star (Yilning raqamli yulduzi)
Ushbu nominatsiyada aktrisa va model Hande Erchel g‘olib chiqdi. Hande nafaqat Turkiyada, balki Yevropada ham bir nechta yirik ijtimoiy tadbirlarda ishtirok etib kelmoqda. Aktrisa butun dunyodan millionlab muxlislarga ega. Uning ijtimoiy tarmoqdagi sahifasiga 31 milliondan ortiq foydalanuvchi obuna bo‘lgan.
Erchelning o‘zi ijtimoiy tarmoqlarda juda faol: u nafaqat ishi va loyihalari, balki sayohatlari haqida ham ko‘p ma’lumotlar beradi.
Hande mazkur tadbir uchun Versace’dan ko‘ylak tanladi.
Yilning eng yosh iste’dodi
Ushbu nominatsiyada Su Burju Jo‘shkun g‘oliblikni qo‘lga kiritdi. 19 yoshli aktrisa joriy yilda “Tungi ertak” serialida ishtirok etdi. Su Burju allaqachon tajribali aktrisa bo‘lib, u o‘z faoliyatini 9 yoshida boshlagan.
Yil dizayneri
Ushbu nominatsiyada g‘oliblik Jeylin Turkkan Bilge ismli mashhur dizaynerga nasib etdi. U Istanbul texnika universitetining dizayn fakultetini tamomlagan va Siedres brendiga asos solgan. Siedres joriy yilda Parijda ham taqdim etildi hamda Gollivudda ham mashhur bo‘la boshladi. Turkkan Bilge tadbirga o‘zining brendiga mansub qizil lisobda tashrif buyurdi.
Yil olimasi
Nashide Go‘zde Durmush “Yilning eng yaxshi ayol olimi” bo‘ldi. U saraton kasalligini davolash sohasida kashfiyot qildi. Nashide saraton hujayralarini aniqlay oladigan magnit chip ishlab chiqdi. U Istanbul universitetining molekulyar biologiya fakultetini tamomlagan, so‘ng Stenford universitetida grant asosida o‘qishni davom ettirgan. Hozirda Durmushning shaxsiy laboratoriyasini mavjud, u yerda mutaxassis saraton kasalligini davolash sohasida yangi texnologiyalar ustida ish olib boradi.
Ayollar huquqlarini targ‘ib qilganlik uchun mukofot
Ushbu nominatsiyadagi mukofot aktrisa Maryam Uzerliga berildi. U haqiqatan ham so‘nggi vaqtlarda ayollar huquqlari haqida ko‘p chiqishlar qiladi va ayollarni muhofaza qilish, ularning huquqlarini cheklamaslik mavzularida turli forumlarda qatnashadi.
Mukofotni olar ekan, u Turkiyada so‘nggi paytlarda ayollarga nisbatan zo‘ravonlik holatlari haqida ko‘p gapirilayotganini, ammo ushbu muammo hali ham o‘z yechimini topmaganini aytib o‘tdi:
“Ayollarga nisbatan zo‘ravonlik haqida gapirganda, yosh aktrisalarga murojaat qilasiz, nega bu haqda gapirmaysiz, nega bu mavzuga munosabat bildirmaysiz, deysiz. Ammo erkaklar-chi? Ular nega mu muammoni ko‘tarmaydi?” dedi Uzerli.
Marosimga aktrisa dizayner Bahar Bukerga tegishli turk brendi Luna B libosida tashrif buyurdi.
Yil sportchisi
“Yilning eng yaxshi sportchisi” nominatsiyasida tennischi Zeynep So‘nmez g‘olib bo‘ldi. U WTA turniri chempioniga aylanganida Turkiya prezidenti Rajab Toyyib Erdo‘g‘on nutq so‘zlab, Zeynepni mamlakatning haqiqiy faxri ekanligini ta’kidlagan edi.
Izoh (0)