Toshkent shahar Mirzo Ulug‘bek tumanida erkak o‘z ayolini pichoqlab o‘ldirdi. Bu haqda “Millar” dasturida xabar berildi.
Maʼlum bo‘lishicha, voqea joriy yilning may oyida tumandagi ko‘p qavatli uylarning birida sodir bo‘lgan. Erkak dastlab ayolining ko‘krak qafasining orqa qismiga, so‘ng old tomoniga pichoq tiqib, tan jarohati yetkazgan.
Jinoyat ishlari bo‘yicha Mirzo Ulug‘bek tuman sudida mazkur holat yuzasidan sud ishi ko‘rib chiqildi. Sudlanuvchi nima sababdan bu jinoyatni sodir etganiga quyidagicha izoh berdi:
“2011-yil ayolim bilan yaxshi niyatda turmush qurganmiz, ikki nafar farzandimiz bor. Qishda kelib, bahorda Rossiyaga ketardim ishlashga. May oyida telefonda boshqa erkak bilan gaplashayotganini eshitib qoldim, kim, deb so‘rasam, dugonam, dedi. Yolg‘on gapirishlar boshlandi. Bilsam spirtli ichimliklar ichadigan bo‘libdi, chekadigan bo‘libdi. 17-may kuni har xil so‘zlar bilan haqoratlab, nafsoniyatimga tegdi. Ruschalab so‘kindi, haromidan olib haromiga soldi, itning bolasi, dedi. Telefonni olib, sindirib tashlasam derazaga yugurdi, baqiraman, dedi. Bilmay qoldim, pichoqladim. Bolalarim chiqib qolganidan keyin o‘zimga keldim. Ikkalasi ham qo‘rqib ko‘chaga qochdi. Mingdan ming pushaymonman. Yaxshi ko‘rardim uni. Shu vaqtgacha oilam uchun yashab kelganman”, — deydi erkak.
Sud hukmi bilan erkak Jinoyat kodeksining 97-moddasi 1-qismi bilan 11 yil muddatga ozodlikdan mahrum qilindi.
Pichoqlash bilan yakunlangan oilaviy janjallar
Mart boshlarida Buxoroda er janjal sabab xotinini pichoqlagani, Jizzaxda er rashk sabab avval xotinini, keyin esa o‘zini pichoqlab o‘ldirgani, Vobkent tumanida mast fuqaro qaynukasini pichoqlagani to‘g‘risida xabar berilgandi.
Shuningdek, 2022-yilning dekabrida Toshkent viloyatida kelin oilaviy kelishmovchilik oqibatida qaynonasini kamida 20 marotaba pichoqlagan edi. Ushbu holat yuz bergan xonadonda qaynona-kelin o‘zaro chiqisha olmay qolgan. Pichoqlangan qaynonaning aytishicha, 9 oydan beri kelini uning gaplariga kirmay, aytgan ishlarini qilmay kelgan.
Izoh (0)