Sirdaryo viloyatining Guliston shahrida yashovchi ayol eri tomonidan ayovsiz kaltaklangani, sochi olib tashlangani haqida xabar berilgandi. “Daryo” bilan muloqotda bo‘lgan ayolning tanishiga ko‘ra, eridan ayovsiz kaltak yegan Nilufar ahvoli abgor holda 20-avgust kuni yarim tunda uning uyiga kelgan.
Yarim kechasi uyimga kelgan Nilufarning ahvoli judayam og‘ir edi. Ichki ishlarga yoki tez yordamga qo‘ng‘iroq qilaylik, dedim. O‘lib qolishidan qo‘rqdim. Yo‘q dedi. Qayta-qayta undadim. Yo‘q deyavergach, mayli, kechasi uxlab dam olsin, ertaga tongda gaplashamiz, dedim. Lekin ming afsuski, erta tongda ham erining ustidan shikoyat qilmasligini, hech kimga xabar bermasligini aytib, menga qarshi turdi, deydi ismi sir qolishini so‘ragan tanish ayol.
Suhbatdoshga ko‘ra, yarim kechasi xonadoniga kelgan Nilufar undan yashirinish uchun joy so‘ragan.
Nilufarning ichi to‘kib tashlangan edi. Yuzlari ko‘karib ketgan. Ko‘zlari shishib yotgandi. Eridan qochib, uydan chiqqanini, uni yashirib qo‘yishimni iltimos qilardi, deydi u.
Ismi sir qolishini so‘ragan manbaning bildirishicha, Nilufarning turmush o‘rtog‘i maktabda jismoniy tarbiya o‘qituvchisi bo‘lib ishlaydi.
Eri qaysidir maktabda jismoniy tarbiya o‘qituvchisi bo‘lib ishlaydi. Nilufar anchadan beri shu tarzda kaltaklanib keladi. Ammo hech qayerga shikoyat qilmaydi. Mening uyimga qochib kelgan kuni ham uch kun davomida bog‘lab qo‘yilganini, og‘zi skotch bilan o‘ralgan holda uch kun och qolganini, to‘rtinchi kuni amallab uydan qochib chiqqanini aytdi, deydi suhbatdosh.
“Daryo” mazkur voqea jamoatchilikka ochiqlangach, Oila va xotin-qizlar qo‘mitasi axborot xizmati rahbari Saodat Boymirzayeva bilan bog‘lanib, qo‘shimcha ma’lumot so‘radi. Mas’ul ayni paytda vaziyatdan bexabar ekanini, biroq Sirdaryo viloyati hokimining xotin-qizlar bo‘yicha mas’ul o‘rinbosari bilan suhbatlashayotganini, holat aniqlashtirilgach, ma’lumot berishini bildirdi.
Izoh (0)