“Nihol” mukofoti sovrindori, xonanda Shahnoza Otaboyeva “Yashin TV” YouTube kanaliga bergan intervyusida shaxsiy hayotidagi muammolar va sobiq turmush o‘rtog‘i Kamol Bobonazarov bilan nima sababdan ajrashgani haqida so‘zlab berdi.
— Turmush o‘rtog‘im bilan to‘liq 3 yil yashadik. Keyin alohida yashadik. Bir yarim yildan keyin farzandlarimiz ota-onasiz o‘smasin, deb yana yarashdik. Lekin yashab keta olmadik. Hozirda qonunan ham, shar’iy tomondan ham ajrashganmiz. Hech qaysi ayol baxtli va to‘kis hayotda yashasa, u hayotini barbod qilib, boshqa yo‘lga ketmaydi. Men qiyinchilik ko‘rib katta bo‘lganman, farzandlarim ota-onasiz katta bo‘lishlarini istamaganman. Balki mening aybim — san’atkor bo‘lganimdadir. Chunki to‘ylar, xizmatlar sabab ko‘p ko‘chada yuramiz. Shu sabab o‘rtamizda kelishmovchiliklar bo‘ldi. Men uyda ham erkak, ham ayol bo‘lib yashashdan charchadim. Necha yillardan beri uyga faqat men bozorlik qilib kelaman. Men ham turmush o‘rtog‘im ro‘zg‘orimni qilib berishini xohlayman.
Xonandaning aytishicha, uning hayotidagi stresslar va asabbuzarliklar ortiqcha vazn to‘plashiga sabab bo‘lgan.
— To‘ydan oldin birga ijod qilishni, xizmatlarga birga chiqib, men qo‘shiq aytib, ular boshlovchilik qilishlarini rejalashtirgandik. Ketma-ket farzand ko‘rdim. Ijodni ham oilam mustahkamlansin, deb tashlab qo‘ydim. To‘yga, xizmatlarga borib kelardim kerak bo‘lsa. Boshida ko‘p qiyinchiliklar bo‘ldi. Yaxshi bo‘lib ketar, deb kurashdim. 27 yoshimda turmushga chiqib, 28 va 29 yoshimda ketma-ket farzandli bo‘ldim. Asabbuzarlik va stresslardan semirib ketdim. Tarozidagi vaznim 120 kiloga qarab ketdi. Har xil diyetalar qildim, dorilar ichdim. Umuman oza olmadim. Oxiri oshqozonimni kestirib 45 kiloga ozdim.
Shahnoza Otaboyeva turmush o‘rtog‘i ular yashab o‘tirgan uyni sotib yuborishi oqibatida ma’lum muddat ijarada yashashga majbur bo‘lgani haqida ham so‘zlab berdi.
— Erkak o‘z ayolini benomuslikda, dilozorlikda ayblasa, oilasini uysiz qoldirsa chiday olmas ekansiz. Yashab o‘tirgan uyimizni sotib yuborgan, puli esa yo‘q bo‘lib ketgan. Mana shu narsalar meni kuchli qildi. Men o‘shanda ikki bolam bilan birovning “tarakanxonasida” yashadim. Mayli, uyni sotib yubording, lekin ayoling va bolalaringni ijaraga olib chiqish yo‘lini qilsang bo‘lardi-ku. Lekin turmush o‘rtog‘im kimnidir topib, meni to‘la holimda ikki bolam bilan shundoq botqoqqa uloqtirib ketdi. Yaqinda shunday holat bo‘ldi: bolam otamni sog‘indim, dedi. Telefon qilsak har doim “Ishim bor hozir, bolam” juda bo‘lmasa “Hozir pulim yo‘q, pulim bo‘lganida boraman”, deydi. Lekin keyinchalik eshitdimki, o‘shanda bir ayolning ofisida uni kutib o‘tirgan ekan.
Izoh (0)