Istanbul meri hokimi Ekrem Imomo‘g‘li tez skanerlash usuli yordamida qulash xavfi yuqori deb tasniflangan uylarni buzish jarayoni boshlangani haqida ma’lum qildi.
“Bu jarayonni tezlashtirish va rag‘batlantirish maqsadida xavfli binolardagi xonadonlar uchun qo‘shimcha 4,5 ming lira ajratamiz. Men barchani bu borada jiddiy hamkorlikka taklif qilaman”, — deya qo‘shimcha qildi u.
O‘tgan haftaning oxirida, 17-fevral kuni Istanbul ma’muriyati zilzila sodir bo‘lsa bir zumda qulashi mumkin bo‘lgan 318 ta binoni sanab chiqqandi. Ularda 10 ming kishi istiqomat qiladi. “Yana 1 525 ta bino D va E toifalariga tegishli – yuqori xavfda. Biz birinchi navbatda 318 ta bino uchun reja tayyorladik, ularda 10 ming kishi istiqomat qiladi — uylar evakuatsiya qilinadi, kvartira egalariga kvartira ijarasi uchun kompensatsiya to‘lanadi”, — dedi Istanbul bosh kotibi yordamchisi Bugra Gyukche.
Uning qo‘shimcha qilishicha, shaharda to‘rtinchi yildirki Texnik universitet bilan hamkorlikda 90 kun ichida uyning barqarorligini baholash bepul dasturi amalga oshirilmoqda. Uch yil ichida rasmiy idoralarga 30 mingga yaqin murojaat kelib tushgan bo‘lsa, 6-fevraldagi zilziladan beri deyarli 40 ming ariza kelib tushdi, deydi u.
Fevral oyi boshidan beri Turkiyada bir necha kuchli zilzilalar sodir bo‘ldi. Birinchi kuchli zilzila yuz bergan 6-fevraldan beri 7 000 dan ortiq yer silkinishlari qayd etilgan. 20-fevral oqshomida Turkiyaning janubi-sharqida, Xatayda ikkita yangi zilzila yuz berdi.
Tabiiy ofatda Turkiyaning o‘zida 43 mingdan ortiq odam halok bo‘ldi, ko‘plab uylar qulab tushdi. Turkiya prokurorlari vayron bo‘lgan uylar qoidabuzarliklar bilan qurilganini, xususan, beton tarkibidagi qum va shag‘al talablarga javob bermasligini ta’kidladi.
Izoh (0)