Turkiyadagi munitsipal saylovlarda hukmron Adolat va taraqqiyot partiyasi (AKP) nomzodlari Istanbul, Anqara va Izmirda mag‘lubiyatga uchradi. Shaharlarda muxolifat nomzodlari va amaldagi merlar katta farq bilan yetakchilik qilmoqda. Bu haqda Anadolu xabar berdi.
Ovoz berish muxolifatning 2023-yil may oyida bo‘lib o‘tgan prezidentlik saylovlarida mag‘lub bo‘lganidan keyin revanshga aylandi. Anqara shahrining amaldagi meri, Respublika Xalq partiyasidan (CHP) nomzod sifatida ishtirok etgan Mansur Yavash o‘z o‘rnini saqlab qolishga muvaffaq bo‘ldi. Saylov byulletenlarining 41,96 foizini sanab chiqish natijalariga ko‘ra, u 58,56 foiz, hukmron partiya nomzodi Turgut Oltinoq esa 33,63 foiz ovoz olgan.
Ovozlarni sanash davom etmoqda (saylov byulletenlarining 90 foizdan ortig‘i ko‘rib chiqilgan). So‘nggi 35 yil ichida birinchi marta dunyoviy rivojlanish tarafdori hisoblangan Respublika Xalq partiyasi (CHP) mamlakatda deyarli 2 foizga yetakchilik qilmoqda.
Turkiya bo‘ylab natijalar (mamlakat bo‘ylab ochilgan saylov qutilari soni 90 foizdan oshgan holda) quyidagicha:
- Respublika Xalq partiyasi — 37,4 foiz;
- Adolat va taraqqiyot partiyasi — 35,73 foiz;
- Yangi farovonlik partiyasi — 6,06 foiz;
- Kurd tarafdori hisoblangan DEM partiyasi — 5,58 foiz;
- Millatchilik harakati partiyasi — 4,88 foiz;
- Yaxshi partiya (konservatorlar) — 3,76 foiz.
Oliy Saylov Kengashi (YSK) ma’lumotlariga ko‘ra, Istanbulning hozirgi meri, Kamolchi Ekrem Imomo‘g‘li 50 foizdan sal ko‘proq ovoz olgan. Imomog‘lining bu safar 2019-yilda g‘alaba qozonishiga yordam bergan koalitsiyadagi hamkorlari ko‘magisiz saylovda qatnashishi unga to‘sqinlik qilmadi. Unga hukmron Adolat va taraqqiyot partiyasidan sobiq atrof-muhit vaziri Murat Qurum qarshi chiqdi. U 40,9 foiz ovoz bilan ikkinchi o‘rinni egallamoqda.
Turkiyada 31-mart kuni mahalliy saylovlar bo‘lib o‘tdi, unda 34 siyosiy partiya ishtirok etdi va 61 milliondan ortiq saylovchi ro‘yxatga olindi. Avvalroq mamlakat prezidenti Rajab Toyyib Erdo‘g‘on bu saylovlar uning siyosiy faoliyatidagi so‘nggisi bo‘lishini ma’lum qilgandi.
Mazkur saylov 5 yil avval kamolchilarga boy berilgan mamlakatning asosiy shaharlari ustidan nazoratni qayta tiklashga intilayotgan Rajab Toyyib Erdo‘g‘on mashhurligining barometri sifatida ko‘rildi.
Mutaxassislarning qayd etishicha, Turkiyaning amaldagi prezidenti ittifoqchilarining ushbu saylovlarda muvaffaqiyatli ishtirok etishi keyinchalik konstitutsiyaviy o‘zgarishlarga yo‘l ochishi va Erdo‘g‘onga 2028-yildan so‘ng, amaldagi vakolat muddati tugagach, hokimiyatni boshqarishiga imkon berishi mumkin.
O‘tgan yilgi prezidentlik va parlament saylovlarida mag‘lub bo'lgan muxolifat uchun esa Istanbul, Anqara va Izmirni saqlab qolish muhim hisoblandi. Sababi bu tarafdorlarini qaytadan safarbar qilish va muhim siyosiy kuch sifatida o‘zini namoyon etishga yo‘l ochadi.
Izoh (0)