Estoniya mamlakat harbiy-dengiz kuchlari ehtiyojlari uchun 12 ta kema qurishni mo‘ljallamoqda. Bu haqda mudofaa vaziri Xanno Pevkur ma’lum qildi, deya xabar bermoqda ERR portali.
Pevkurning aytishicha, Estoniyaga jami uzunligi taxminan 90 metr bo‘lgan uchta katta kema, shuningdek, uzunligi 60-70 metr bo‘lgan to‘qqizta kichikroq kema zarur.
“Bunday o‘lchamdagi kemalar qurilishi haqida gap ketganda, asosan ikkita korxona - Baltic Workboats va BLRT nazarda tutilmoqda. Biroq kichik kemasozlik korxonalari ham o‘z imkoniyatlarini kichikroq kemalarni qura oladigan darajaga yetkazishini istisno qilmayman”, dedi Pevkur.
Estoniya Shvetsiyaning RISE milliy tadqiqot institutiga qaysi kema harbiy, chegara va qutqaruv vazifalarini bajarish, shuningdek, ifloslanishga qarshi kurashish uchun maqbul ekanligini tahlil qilishni topshirgan.
“Tavsiyalar yaqin oylar ichida olinishi kutilmoqda. Eng muhimi Boltiqbo‘yi mintaqasi yoki Boltiq dengizi uchun eng mos keladigan, harbiy-dengiz kuchlariga ko‘p vazifalilikni ta’minlaydigan kema haqida aniq tasavvurga ega bo‘lish”, deya izoh bergan Pevkur.
Izoh (0)