Эстония мамлакат ҳарбий-денгиз кучлари эҳтиёжлари учун 12 та кема қуришни мўлжалламоқда. Бу ҳақда мудофаа вазири Ханно Певкур маълум қилди, дея хабар бермоқда ERR портали.
Певкурнинг айтишича, Эстонияга жами узунлиги тахминан 90 метр бўлган учта катта кема, шунингдек, узунлиги 60-70 метр бўлган тўққизта кичикроқ кема зарур.
“Бундай ўлчамдаги кемалар қурилиши ҳақида гап кетганда, асосан иккита корхона - Baltic Workboats ва BLRT назарда тутилмоқда. Бироқ кичик кемасозлик корхоналари ҳам ўз имкониятларини кичикроқ кемаларни қура оладиган даражага етказишини истисно қилмайман”, деди Певкур.
Эстония Швециянинг RISE миллий тадқиқот институтига қайси кема ҳарбий, чегара ва қутқарув вазифаларини бажариш, шунингдек, ифлосланишга қарши курашиш учун мақбул эканлигини таҳлил қилишни топширган.
“Тавсиялар яқин ойлар ичида олиниши кутилмоқда. Энг муҳими Болтиқбўйи минтақаси ёки Болтиқ денгизи учун энг мос келадиган, ҳарбий-денгиз кучларига кўп вазифалиликни таъминлайдиган кема ҳақида аниқ тасаввурга эга бўлиш”, дея изоҳ берган Певкур.
Изоҳ (0)