Хитойнинг IT-гиганти Huawei маҳаллий автомобиль блогерини ҳашаматли Maextro S800 седанини танқид қилгани учун судга берди. Компания 140 минг долларга тенг маблағ сўради, деб хабар берди CarNewsChina.
Huawei S800 ни Mercedes Maybach S680 билан таққослаган бир қатор реклама видеоларини чиқарди. Улардан бирида компания шиша пластина, қум ва сув билан асфалтдаги чуқурликлардан ўтишда икки моделнинг осма тизими ишлашидаги фарқни намойиш этган. Барча ҳолатларда Хитой седанининг ғилдираклари, немисларникидан фарқли ўлароқ, ойнани синдирмаган, шунингдек, қум ва сувга тегмаган. Шундай йўл билан Huawei S800 қулайлигини эълон қилишга интилган.
Хитойнинг Weibo ижтимоий тармоғида Racing Frappuccino тахаллусли автоблогер ушбу видеоролик S800 моделининг устунлигини намойиш этиш учун махсус ҳисоблаб чиқилганини таъкидлаган видеони жойлаштирган.
Гўёки видеони тайёрлаш учун Хитой седанининг жиҳозланган массаси бўйича ҳаракат тезлиги махсус ҳисоблаб чиқилган ва сув идишининг керакли чуқурлиги танланган.
Блогер Huawei устидан 340 минг долларлик қарши даъво аризаси беришини айтди.
Maextro S800 — Huawei ва JAC томонидан ишлаб чиқилган 5480 мм узунликдаги ҳашаматли седан ҳисобланади. Автомобиль ҳам соф электр, ҳам куч қурилмасининг гибрид вариантларида ишлайди. Моделнинг ХХРда сотуви жорий йилда бошланиши керак.
Изоҳ (0)