2020-yilning yozida Xiaomi Mi 10 Ultra smartfoni rasman taqdim etilishidan oldin internetda ushbu qurilma qutisidan olinayotgani tasvirlangan videorolik paydo bo‘lgan edi. Keyinroq bu smartfonni test qilish uchun birinchilardan bo‘lib qo‘lga kiritgan va u haqida ma’lumot tarqatmaslik to‘g‘risida bitim imzolagan blogerlarning aybi bilan amalga oshgani ma’lum bo‘lgan, deb xabar beradi IXBT.
Hozirga kelib vaziyatga butunlay oydinlik kiritildi: bloger ochiq xat bilan murojaat qilib, xatoga yo‘l qo‘yganini va Xiaomi bilan imzolangan maxfiylik bitimini buzganini tan olgan.
E’lon qilingan ma’lumotlarga ko‘ra, bloger Xiaomi’ga 150 ming dollarga yaqin jarimani 30 kun ichida to‘lashi kerak. shuningdek, sud bloger Xiaomi’dan ommaviy uzr so‘rashi kerakligini belgilab qo‘ygan — u buni amalga oshirgan.
“Ushbu ish Xitoy xalqaro iqtisodiy va savdo arbitraj komissiyasi tomonidan ko‘rib chiqilgan va mening harakatlarim maxfiylik siyosatini buzish deya topildi hamda jiddiy oqibatlarga olib keldi. Xiaomi kompensatsiya undirishi kerak. Mazkur qarorga qo‘shilaman va tegishli mas’uliyatni zimmamga olishga tayyorman. Menga ulkan ishonch bildirgan Xiaomi va uning bosh direktori Ley Szyunyuga chin ko‘ngildan minnatdorchiligimni bildiraman va ulardan uzr so‘rayman”, — deydi bloger.
Uning aniqlik kiritishicha, videorolikni u emas, balki kompyuteridan foydalana oladigan onasi e’lon qilib yuborgan. Ayol videorolikni tarmoqqa qasddan joylamaganini tan olgan, shu bilan birga, u bu kabi muhim ma’lumotni oshkor qilmaslik bo‘yicha bitim imzolanganidan bexabar bo‘lgan.
Izoh (0)