AQSH Davlat kotibi Marko Rubio Tailand rasmiylariga qarshi viza sanksiyalari joriy etilganini e’lon qildi. Bunga mamlakatda saqlanayotgan kamida 40 nafar uyg‘urning Pekin so‘roviga binoan deportatsiya qilinishi sabab bo‘ldi. Vashingtonning ta’kidlashicha, ular Xitoyda ta’qib va qiynoqlarga duch kelishi mumkin.
AQSH bosh diplomatiga ko‘ra, cheklovlar Tailand hukumatining amaldagi va sobiq rasmiylariga taalluqli bo‘lib, ularning oila a’zolariga ham ta’sir qilishi mumkin.
“Xitoyning uyg‘urlarga qarshi uzoq yillardan beri davom etayotgan genotsidi va insoniyatga qarshi jinoyatlarini inobatga olib, biz barcha davlatlarni uyg‘urlar va boshqa guruhlarni Xitoyga majburan qaytarmaslikka chaqiramiz,” dedi Rubio.
Biroq Davlat departamenti necha nafar amaldor uchun Qo‘shma Shtatlarga kirish chelanganini ochiqlamadi. AQSH immigratsiya qonunlari maxfiylikni talab qilgani bois odatda viza taqiqlari qo‘yilgan shaxslarning ismlari oshkor qilinmaydi.
Ma'lum bo‘lishicha, Tailand hukumati 2014-yili Xitoydan qochib o‘tgan va o‘shandan buyon migratsiya hibsxonasida saqlanayotgan uyg‘urlarni joriy yilning fevral oyida Xitoyga topshirib yuborgan. BMT inson huquqlari bo‘yicha ekspertlari bunga munosabat bildirib, ularning kelgusi taqdiridan xavotirlarini bayon qilgan edi. Tailand Tashqi ishlar vazirligi bunga javoban, Pekin uyg‘urlarning xavfsizligini kafolatlaganini ta’kidladi. Bundan tashqari, Bangkok ularning holidan xabar olish uchun delegatsiya yuborishini iddao qildi.
Dunyo Uyg‘urlar Kongresi ijroiy qo‘mitasi raisi Rushan Abbos Qo‘shma Shtatlarning viza sanksiyalarini olqishlab, bu qaror “boshqa davlatlar uchun signal bo‘lishi va uyg‘urlarni Xitoyga qaytarishga yordam bermoqchi bo‘layotganlarni ogohlikka chaqirishi”ni ta’kidladi.
“Bu uyg‘urlarni majburan deportatsiya qilishda ishtirok etganlarni javobgarlikka tortish yo‘lida muhim qadamdir. Uyg‘urlar uchun Xitoyga majburan qaytarilish o‘lim hukmiga teng, chunki ular qiynoq, majburiy mehnat va yo‘qolib ketish xavfiga duch keladi,” deya qo‘shimcha qildi u.
Yevropa parlamenti ham Tailand hukumatini keskin tanqid qilib, mamlakatga bosim o‘tkazish uchun erkin savdo bo‘yicha muzokaralardan foydalanishga chaqirdi.
Izoh (0)