Сурхондарё вилоятидаги Сурхон дарёсидан қум қазиб олганлар жами 78 млн сўм тўлайдиган бўлди. Бу ҳақда вилоят Экология бошқармаси хабар берди.
Келтирилишича, Экология бошқармаси ва вилоят Миллий гвардия бошқармаси ходимлари ҳамкорлигида вилоят бўйлаб тунги назорат рейд тадбирлари ўтказилди. Тезкор тадбирлар давомида Жарқўрғон тумани “Янги усул” маҳалласи ҳудудидан оқиб ўтувчи Сурхон дарёси бўйида ноқонуний қум қазиш ҳолати аниқланди.
Жарқўрғон тумани “Дам” маҳалласи фуқароси Б.Ю. ўз бошқарувидаги Фронтал юклагич (лепҳур) ёрдамида қум хом ашёсини ноқонуний равишда юклаётган бўлган. Шунингдек, А.С. ва “Полвонлар юрти” маҳалласи фуқароси Т.И. эса ўз бошқарувидаги “КамАЗ” ва Hоwо русумли юк машиналарига ушбу қумни ортиб кетаётган бўлган.
Тадбир давомида ушбу қонунбузарлик ҳолати расмийлаштирилиб, барча шахсларга нисбатан Маъмурий жавобгарлик тўғрисидаги кодекснинг 70-моддаси 1-қисми асосида маъмурий чоралар кўрилди.
Ҳар бир қоидабузарга 11 миллион 250 000 минг сўм (БҲМнинг 30 баробари) миқдорида жарима белгиланиб, табиатга етказилган 45 миллион сўм зарар ҳисобланди. Жами ҳисобда 78 миллион 750 000 сўм миқдорида маъмурий чора кўрилди.
Дарёлар ўзанларидаги норуда материалларни қазиб олишга муддатсиз мораторий жорий этилган
Президент фармони билан Чирчиқ, Сангзор, Зарафшон, Норин, Қашқадарё, Сурхондарё ва Сирдарё дарёлари ўзанларидаги норуда материалларни қазиб олишга 2024 йил 1 майдан муддатсиз мораторий жорий қилинди. Ноқонуний қазиб олиш ишлари натижасида табиатга етказилган зарар учун жавобгарлик ҳам кучайтирилди.
Шунга қарамай, ноқонуний қум-шағал қазиб олиш давом этмоқда. 12 февраль куни Сурхондарё ва Тошкент вилоятларида табиий қум хом ашёсини ўзбошимчалик билан қазиб олиш ҳолатлари фош этилди. Тошкент вилояти Бекобод туманида ноқонуний равишда қум қазиб олиниши оқибатида табиатга 100 миллиард сўмдан ортиқ зарар етказилди.
13 январда Самарқанднинг икки ҳудудида қум-шағал қазиб олиниши оқибатида табиатга 826 миллиард сўм зарар етказилганди.
Изоҳ (0)