Ekologiya, atrof-muhit va iqlim o‘zgarishi vazirligi tomonidan Toshkent viloyati Yuqori Chirchiq tumani hududidan oqib o‘tuvchi Chirchiq daryosida nazorat reyd tadbirlari olib borildi. Bu haqda vazirlik matbuot xizmati xabar berdi.
Qayd etilishicha, reyd davomida daryoning muhofaza mintaqasidan 1 dona yuklovchi va 2 dona MAN rusumli yuk tashuvchi transport vositalari yordamida shag‘al mahsulotini noqonuniy qazib olib ketilayotgani aniqlangan.
Surishtiruv davomida qum-shag‘al “Sharq neftgaz biznes” MCHJ rahbari O.K. tomonidan qazdirilgani maʼlum bo‘lgan. Holat yuzasidan tegishli dalolatnoma rasmiylashtirilib, haydovchilar va MCHJ rahbaridan tushuntirish xatlari olingan. Shuningdek, ikkita yuk mashinasi hamda ekskavator jarima maydoniga joylashtirilgan.
Shag‘al mahsuloti qazilgan joyda olib borilgan o‘lchov natijasida tabiatga yetkazilgan zarar 6 milliard 635 million 894 ming so‘mni tashkil qilgan. Holat natijasida “Tabiatni muhofaza qilish to‘g‘risida”gi qonuni 18-moddasi hamda “Yer osti boyliklari to‘g‘risida”gi qonunning 18-moddasi talablari buzilgan.
Holatga huquqiy baho berish va aybdorlarga nisbatan qonuniy chora ko‘rishni taʼminlash maqsadida tegishli hujjatlar Bosh prokuraturaga yuborilgan.
Ma’lumot uchun, prezident farmoni bilan Chirchiq, Sangzor, Zarafshon, Norin, Qashqadaryo, Surxondaryo va Sirdaryo daryolari o‘zanlaridagi noruda materiallarni qazib olishga 2024-yil 1-maydan muddatsiz moratoriy joriy qilinadi. Noqonuniy qazib olish ishlari natijasida tabiatga yetkazilgan zarar uchun javobgarlik ham kuchaytiriladi.
Izoh (0)