O‘zbekistonda 3-mart kuni imzolangan qonun bilan qurilish maydonlarida atmosfera havosini muhofaza qilish talablariga rioya etmaganlik uchun javobgarlik belgilandi.
Qonunga ko‘ra, Ma’muriy javobgarlik to‘g‘risidagi kodeksga qurilish maydonlarida atmosfera havosini muhofaza qilish talablariga rioya etmaganlik uchun javobgarlikni belgilovchi qo‘shimchalar va o‘zgartirish kiritildi.
O‘lchami besh yuz kvadrat metr va undan ortiq bo‘lgan qurilish maydonida, unga tutash bo‘lgan hududda hamda undan chiqish yo‘llarida chang va qum zarrachalarining havoga ko‘tarilishini bartaraf etishga doir majburiy talablarni buzish yoxud ushbu hududlarda ifloslantiruvchi moddalarning yo‘l qo‘yiladigan doiradagi normativlardan ortiq darajada atmosfera havosiga chiqarilishiga yo‘l qo‘yish mansabdor shaxslarga BHMning 10 baravari — 3 million 750 ming so‘m miqdorida jarima solishga sabab bo‘ladi.
Xuddi shunday huquqbuzarlik ma’muriy jazo chorasi qo‘llanganidan keyin bir yil davomida takror sodir etilgan bo‘lsa, mansabdor shaxslarga BHMning 50 baravari — 18 million 750 ming so‘m miqdorida jarima solishga sabab bo‘ladi.
Qonun rasmiy e’lon qilingan kundan e’tiboran 3 oy o‘tgach kuchga kiradi.
O‘zbekistonda qurilish maydonlarida atmosfera havosi talablarini buzganlarni jarimaga tortilish rejasi 2024-yilning dekabrida ma’lum qilingandi. Tegishli javobgarlik ko‘zda tutilgan qonun Oliy Majlis Qonunchilik palatasi tomonidan 2025-yil 24-yanvarda qabul qilinib, Senat tomonidan 20-fevralda ma’qullangandi.
Izoh (0)