Futbol bo‘yicha O‘zbekiston Kubogining nimchorak finalidan o‘rin olgan uchrashuvlar 25-iyun, chorshanba kuni o‘tkazildi.
Bugungi belgilangan bahs Olmaliqda – “Buxoro” – “OKMK” jamoalari o‘rtasida kechdi.
Uchrashuvdagi barcha gollar birinchi bo‘limda urildi. Jumladan,25-daqiqada buxoroliklar vakili Yosip Tomashevich o‘z darvozasiga to‘p kiritib qo‘ydi. Oradan 6 daqiqa o‘tar-o‘tmas olmaliqliklar vakili ham avtogol muallifi bo‘ldi. Bu galgi qahramon – Javohir Ilyosov.
34-daqiqada “Buxoro” hujumchisi Shohruz Norxonov jamoasini hisobda oldinga olib chiqdi. 45+1-daqiqada esa Asilbek Qayumov hisobni oshirdi.
Ikkinchi bo‘limda qator vaziyatlar yaratildi, ammo ulardan naf chiqmadi. Hisob boshqa o‘zgarmadi va “Buxoro” chorak final yo‘llanmasini qo‘lga kiritdi.
O‘zbekiston Kubogi
Nimchorak final
25-iyun, chorshanba
“Buxoro” — “OKMK” 3:1
Gollar: Yosip Tomashevich, 25 avtogol (0:1), Javohir Ilyosov, 31 avtogol (1:1), Shohruz Norxonov, 34 (2:1), Asilbek Qayumov, 45+1 (3:1)
Izoh (0)