NATO davlatlari 2035-yilga kelib mudofaa xarajatlarini yalpi ichki mahsulotning 5 foizigacha oshirish majburiyatini oldi. Bu haqda Gaagadagi sammit yakunlari bo‘yicha qabul qilingan deklaratsiya matnida aytilgan.
Hujjatda ta’kidlanishicha, Shimoliy Atlantika alyansi davlatlari “asosiy tahdidlar”, xususan, Rossiya tomonidan uzoq muddatli xavf oldida birlashgan. Shuningdek, davlatlar Ukrainani qo‘llab-quvvatlash bo‘yicha o‘z majburiyatlarini tasdiqlagan.
“Ittifoqchilar Vashington shartnomasining 3-moddasiga muvofiq shaxsiy va jamoaviy majburiyatlarimizni ta’minlash uchun 2035-yilgacha asosiy mudofaa ehtiyojlari, shuningdek, mudofaa va xavfsizlik bilan bog‘liq xarajatlar uchun har yili yalpi ichki mahsulotning 5 foizini sarflash majburiyatini oladi”, deyiladi hujjatda.
Hujjatda aniqlik kiritilishicha, NATO davlatlari asosiy mudofaa ehtiyojlarini ta’minlash va alyansning harbiy imkoniyatlar sohasidagi maqsadli ko‘rsatkichlariga erishish uchun har yili yalpi ichki mahsulotning kamida 3,5 foizini ajratadi. Yalpi ichki mahsulotning yana 1,5 foizi har yili NATOning muhim infratuzilmasi va tarmoqlarini himoya qilish, mudofaa-sanoat bazasini mustahkamlash, fuqarolik tayyorgarligi va barqarorligini ta’minlash, innovatsiyalarni rag‘batlantirish uchun sarflanadi. Reja doirasidagi xarajatlar 2029-yilda strategik vaziyat va alyansning yangilangan “salohiyat sohasidagi” maqsadlariga muvofiq qayta ko‘rib chiqiladi.
Shuningdek, NATO “alyans xavfsizligiga hissa qo‘shadigan” Ukrainaga yordam ko‘rsatish bo‘yicha o‘z majburiyatlarini tasdiqlagan. Mudofaa xarajatlarini hisoblashda mamlakat mudofaa qobiliyati va mudofaa-sanoat kompleksini qo‘llab-quvvatlash uchun to‘g‘ridan-to‘g‘ri badallar hisobga olinadi.
The Telegraph’ning qo‘shimcha qilishicha, kommyunike matni AQSH prezidenti Donald Tramp va NATOga a’zo boshqa davlatlar yetakchilari o‘rtasidagi “kelishuv”ga ishora qilmoqda. Xususan, Ukrainani qo‘llab-quvvatlash qismida unga nima uchun yordam kerakligi aytilmagan. Shunday qilib, bu alyans davlatlarining 2022-yildan beri birinchi deklaratsiyasi bo‘lib, unda Rossiyaning “harbiy maxsus operatsiya” o‘tkazgani uchun qoralanishi haqida ma’lumotlar yo‘q.
Izoh (0)