AQSH prezidenti Donald Tramp yaqinda Eron yadro obyektlariga berilgan aviazarbalarga izoh berar ekan, AQSHning Ikkinchi jahon urushi davridagi harakatlariga tarixiy o‘xshashlik keltirdi. Bu haqda The New York Times xabar bermoqda.
AQSH prezidenti Gaagada so‘zlagan nutqida Eronga berilgan zarbalar, uning fikricha, bir paytlar yadro zarbalari Yaponiya bilan urushni tugatgani kabi Tehron tahdidiga barham berganini ta’kidlagan.
“Bu zarba bilan muvaffaqiyatga erishmadikmi? Bu zarba urushni tugatdi. Ular buni amalga oshirish uchun trillionlab dollar sarfladilar va eplab bo‘lmadilar. Biz esa hozirda ular bilan juda yaxshi munosabatdamiz”, dedi Tramp.
U AQSHning harakatlarini Ikkinchi jahon urushi davridagi tarixiy voqealar bilan solishtirgan.
“Men Xirosima misolini keltirmoqchi emasman, Nagasaki misolini ham keltirmoqchi emasman, lekin bu mohiyatan o‘sha urushni tugatgan narsa edi. Bu unga, bu urushga chek qo‘ydi. Agar biz shunday qilmaganimizda, ular hozir ham urushayotgan bo‘lardi”, dedi AQSH prezidenti.
Trampning fikricha, Eron hozirda “biror narsani boyitish”ni emas, balki “tiklanishni istayapti”.
“Tehronning yadro dasturi Amerika bombardimonlari natijasida o‘n yillab orqaga surildi”, deya ta’kidladi Oq uy rahbari.
Shuningdek, prezident eronliklarning o‘z obyektlaridan materiallarni, jumladan, uranni olib chiqib ketishga vaqti bo‘lganiga ishonmasligini aytgan, chunki AQSH “tez harakat qilgan”.
Oq uy rahbari agar Tehron uranni boyitish dasturini tiklasa, AQSH qo‘shinlari yangi zarba berishini ta’kidlagan.
Ma’lumot uchun, 1945-yil avgustda amerikalik uchuvchilar Yaponiyaning Xirosima va Nagasaki shaharlariga atom bombasini tashladi. Atom portlashi va uning oqibatlaridan Xirosimada 350 ming aholidan 140 ming kishi, Nagasakida 74 ming kishi halok bo‘ldi. Atom bombasi qurbonlarining aksariyati tinch aholi edi. Fojiali voqealarning yilligida — 6 va 9-avgust kunlari Xirosima va Nagasakida har yili “Tinchlik marosimlari” o‘tkaziladi.
Izoh (0)