Hindistonda ishlab chiqarilgan yo‘tal siropining 300 dan ortiq namunalari tarkibida xavfli zaharli moddalar mavjudligi sababli sifat standartlariga javob bermasligi aniqlangan.
Bu haqda Hindiston sog‘liqni saqlash va oilani qo‘llab-quvvatlash vazirligi hisobotiga tayanib, The Economic Times gazetasi xabar berdi.
Maʼlumotlarga ko‘ra, Hindistonning Dori vositalari standartlarini nazorat qilish markaziy tashkiloti tomonidan dori vositalarining 7 mingdan ortiq namunalari tekshirilganda ularning 335 tasida dietilenglikol va etilenglikol xavfli moddalari borligi aniqlangan.
Jahon sog‘liqni saqlash tashkiloti (JSST) 2022-yil oktyabr oyida Hindistonning Maiden Pharmaceuticals kompaniyasi tomonidan ishlab chiqarilgan to‘rtta bolalar dori-darmonlari Gambiyada 66 bolaning o‘limiga aloqador bo‘lishi mumkinligi haqida xabar berganidan so‘ng, Hindiston hukumati yo‘tal siroplari sifatini nazorat qilishni kuchaytirdi.
JSST prometazinning ichish uchun tayyorlangan eritmasi, “Kofexmalin” va “Makoff” bolalar uchun yo‘tal siroplari hamda kompaniya tomonidan Sonipat korxonasida ishlab chiqarilgan shamollashga qarshi “Magrip N” siropi tarkibida bolalarning buyraklariga zarar yetkazishi mumkin bo‘lgan toksinlar mavjudligini aniqladi.
Hindistonda ishlab chiqarilgan “Dok-1 Maks” siropini iste’mol qilish ortidan 2022-yilda O‘zbekistonda ham 68 nafar bola vafot etgani va 16 nafar bola nogiron bo‘lib qolgani ma’lum qilingandi.
“Daryo” mazkur holat bilan bog‘liq sud jarayonlarini muntazam yoritib kelmoqda.
Izoh (0)