Kliplardagi ishtiroki bilan tomoshabinlar nazariga tushgan mahoratli aktrisa Yulduz Rajabova 23-dekabr kuni 34 yoshni qarshi oldi. Ushbu sana munosabati bilan aktrisaning hayoti va ijod yo‘liga nazar tashlaymiz.
Yulduz Rajabova 1989-yilning 23-dekabrida Navoiy shahrida tug‘ilgan. Uning onasi uy bekasi, otasi esa jurnalist bo‘lib, aktrisaning bir akasi bor. Yulduz bolaligida sanʼatga qiziqishi bois Navoiy shahridagi Farhod nomli madaniyat saroyidagi raqs to‘garagiga qatnashgan. O‘rta maktabni tamomlagach, tarjimon bo‘lish niyatida chet tillarini o‘rganishni boshlagan. Lekin bu sohada ishlamagan.
Keyinchalik O‘zbekiston davlat sanʼat va madaniyat institutida tahsil olgan. Yulduz o‘z ijodiy faoliyatini shu oliygoh qoshidagi teatrda boshlagan. Keyinchalik videokliplardagi ishtiroki bilan tanila boshlagan. Aktrisa 2013-yilda Said Muxtorovning “Xazon” nomli qisqa metrajli filmida ilk bor suratga tushdi. U faoliyati davomida bugungacha “Turist” (2013), “Sotqin” (2016), “Yuragimdasan” (2018), “Oyqiz ertagi”, “Maqsad” (2018) “Skorpion”(2018), “Yolg‘on girdobi” (2018) kabi filmlar va “Mendirman Jaloliddin” nomli serialda suratga tushdi. Yulduz ayni damda “Diydor” teatr studiyasida faoliyat yuritadi.
Aktrisa Oskar mukofotiga tavsiya etilgan “Faridaning ikki ming qo‘shig‘i” filmida ham bosh rolni ijro etgan.
“Ikki yil jahon tillari universitetiga topshirib, kira olmaganman”
— Bolalikdan raqs sanʼatiga qiziqqanman, ammo tarjimon bo‘lish xohishi ustunlik qilgan. Ingliz tilini o‘rganishga jiddiy kirishganman, ammo ikki yil Jahon tillari universitetiga hujjat topshirib kirolmaganman. Uchinchi yil O‘zbekiston davlat sanʼat va madaniyat institutiga hujjat topshirish fikri tug‘ilgan. Albatta, qarshiliklar bo‘lgan, ammo onam hamisha qo‘llab-quvvatlab, imtihonlarga o‘zi olib kelgan. Har qanday inson qo‘llab-quvvatlaydigan odamga muhtojlik sezadi. Biror ishni qilishda ikkilanib tursangiz, o‘sha insonning ishonchi katta kuch beradi. Aktrisa bo‘lishimga onamning ishonchi yuqori bo‘lgan.
Hozir ingliz tilini bilaman va o‘rganishda davom etyapman
“Rep aytishga qiziqaman”
Yulduz Rajabovaning yaxshi qo‘shiq ayta olishini ko‘pchilik muxlislari biladi. Aktrisa bundan bir necha yil avval Maksim Fadeyevning “Oynalardagi raqslar” qo‘shig‘ini ijro etib, Instagram’dagi sahifasiga joylashtirgan hamda muxlislarining tahsiniga sazovor bo‘lgan edi. Xonanda intervyularidan birida rep kuylashga qiziqishini aytib o‘tgan.
— Rep yo‘nalishidagi qo‘shiqni aytishga qiziqaman. Bolalikdan qo‘shiqchilikka ishtiyoqim baland bo‘lgan. Lekin aynan sof rep yo‘nalishida qo‘shiq aytishni orzu qilaman
“Yalindik, yolvordik, lekin ular qo‘limizdagi hamma narsani tortib oldi”
Aktrisa intervyularidan birida bolaligida onasi bilan bo‘lgan ayanchli voqea haqida so‘zlab bergan.
— Onam bozorda kitob sotardi. Men ham maktabdan so‘ng onamning yoniga borib, unga yordam berardim. Kitoblarni birgalikda sotardik. Bir kun bozorga tekshiruvchilar keldi. Bizda ruxsatnoma bor edi, biroq uning amal qilish muddati biroz o‘tgandi. Toshkentdan kelgan tekshiruvchilar qo‘limizda nima bo‘lsa, hammasini tortib olishdi. Kitob, daftar, qalam, ruchka — hammasidan ayrildik. O‘sha kuni onamning yuz ifodasini, nimalar his etganini juda yaxshi xotirlayman. Bir farzand o‘laroq onangga yordam bera olmaslik, juda ham og‘ir. Bu kun hech qachon esimdan chiqmaydi. Biz u insonlarga yalindik, yolvordik, ammo afsuski hech qanday natija bo‘lmadi. Undan so‘ng oyoqqa qalqish juda qiyin bo‘ldi. Onam katta qarz ko‘tarib, ishini noldan boshladi. Qarzlarni sekin-asta uzib, oyoqqa turdik”, — deya xotirlaydi Yulduz Rajabova.
“Yaqinda yaxshi bir uy oldim. Onam ‘O‘tgan yaxshi yomon kunlarimiz uchun, aynan ushbu taqdir yo‘lini yashab o‘tganimiz uchun shukr’, dedilar”, — deydi aktrisa.
Talabalik yillaridagi moddiy qiyinchiliklar haqida
— Institutda o‘qigan paytlarimda pul masalasida qiynalganman. To‘rtta kursdoshim bilan nonni olib, kesib “suxarik” qilardik va butun kun davomida shuni yeb yurar edik. Stipendiya olish uchun ijtimoiy fanlardan ham yaxshi bahoga o‘qiganman. Stipendiyani olishim bilan turadigan uyimizning ijara haqqini berardim. Inson o‘zini o‘zi eplay oladi, lekin oilasi bilan bo‘lsa qaysidir narsalardan voz kechib pul ishlashiga to‘g‘ri keladi.
“Mendirman Jaloliddin” serialida juda katta muhabbat bor
“Mendirman Jaloliddin” seriali haqida boshidan salbiy izoh berila boshlandi. Fikrlar faqat salbiy bo‘ldi. Men Ozodbek akaning fikrlarini tushundim, bu serial faqat biz uchun emas, tariximizni chet elga sotish uchun bizdagi jahon standartlariga mos bo‘lgan aktyor, aktrisalarni ko‘rsatish, jahon standartlariga mos bo‘lgan loyiha yaratish uchun qilindi. Bir haftada serialning bitta qismi namoyish etildi. Boshqa mamlakatlarda ham seriallarning bitta qismi haftada bir marta chiqadi.
Biz ham butun dunyoga moslab shu narsani qo‘llab ko‘rdik. Kunlik serial olish juda ham qiyin. Turkiyada, Qozog‘istonda yoki boshqa mamlakatlarda seriallarning bir qismi haftada bir marotaba berib boriladi. Bir haftada birinchi, ikkinchi haftada ikkinchi va uchinchi haftada uchinchi qismini taqdim etishadi, sifat ham shunga yarasha bo‘ladi.
Bir kunda 35 ta epizod suratga olinsa, serial sifatsiz bo‘lib qoladi. Serialni tomosha qilish yoki qilmaslik har kimning o‘z fikri. Biz unga jonimizni berib ishladik. Yaxshi narsa chiqdi, juda ham katta mehnat bor bo‘lgan loyiha bo‘ldi. Serialda juda katta muhabbat bor.
Yulduz va Emre
Yulduz Rajabova “Mendirman Jaloliddin” serialining suratga olish jarayonlarida turk aktyori Emre Kiviljim bilan tanishdi. Emre serialda Jaloliddinni, Yulduz esa Jaloliddinning sevgilisi Qutlibekani ijro etdi. Bora-bora aktyorlarning ekrandagi sevgisi hayotga ham ko‘chdi. Yulduz va Emrening bir-birga befarq emasligi “Mendirman Jaloliddin”ning Toshkentdagi taqdimotida sezildi.
Oradan biroz vaqt o‘tgach, Emre Instagram sahifasi orqali Yulduzni tug‘ilgan kuni bilan tabrikladi hamda “Tug‘ilgan kuning bilan sevgilim” deb yozdi. Shundan so‘ng Yulduz va Emre o‘rtasidagi muhabbat muxlislarga oshkor bo‘ldi. Ular bir necha bor chet el sayohatlarida ham birgalikda ko‘rinish berdi.
Oradan ikki yil o‘tib, Emre Kiviljim “Vido maktubi” deb nomlangan serialda suratga tushdi. Shundan so‘ng Emrening serialdagi partnyori Robiya Soyturkka ko‘ngil qo‘ygani haqida mish-mishlar tarqaldi. Biroq Emre jurnalist Jasur Hamroyevga bergan intervyusida Yulduzga bo‘lgan hislari haqiqiy ekanligini ta’kidladi.
“Yulduz bilan hali ham gaplashamiz, ko‘rishib turamiz. Munosabatlarimiz hammasi yaxshi. Sevgimiz bitmas, u mozorga qadar. Yulduzni haliyam yuragimdan sevaman”, — dedi Emre.
“Bu tuzaladigan kasallik emas”
Yulduz intervyularidan birida bir necha yildan buyon bosh og‘riqlaridan aziyat chekishi haqida gapirgan.
— Juda ko‘p yillardan beri meni bosh og‘riqlar qiynab keladi. Lekin bu migren bilan bog‘liq. Ayni shu kasalligi bor insonlar meni yaxshi tushunadi. Bu bosh og‘riq bilan hech narsa qila olmaysiz. Ba’zida shunday og‘riydi, hech qanday dori yordam bermaydi. Migrenni davolash qiyin. Men bir nechta shifokorlar bilan maslahatlashib, bu tuzaladigan kasallik emas, degan fikrga keldim. Uni qanaqadir usullar bilan og‘rig‘ini kamaytirish mumkin. Yoki har olti oyda ukolini olish mumkin. Hozirda shulardan foydalanyapman”, — deydi aktrisa.
Ishongan insonlari haqida
— Birinchi navbatda inson shaxsiy hayoti haqida gapirishga tayyor bo‘lishi kerak. Inson shaxsiy hayoti haqida yangi hayotga qadam qo‘yayotganda, o‘ziga ishonch hosil qilgandan keyin aytishi kerak deb o‘ylayman.
Hayotdagi tanlovlar borasida o‘zim ishongan 3-4 kishidan maslahat olaman. Bir vaqtlar atrofimda do‘stlarim bor edi, ammo vaqt o‘tib bitta o‘zim qolib ketgan paytlar ham bo‘ldi. Bu borada hech kimni aybdor qilmoqchi emasman, lekin Alloh sinov berganda oldimizda kim qolishini va qolmasligini ko‘rsatib berar ekan. Hech qachon do‘stsiz bir o‘zim qolib ketaman, deb o‘ylamaganman. Yaxshi ham shunaqa bo‘ldi, shundan keyin o‘zimni eshitishni boshladim.
O‘sha paytda atrofimda qolgan 3-4 kishining fikri meniki bilan hamohang ekanini tushunib yetdim. Bugungi kunda do‘st tanlamayman, atrofimda o‘zim ishongan yaqinlarim bor. O‘rtoqlarim bo‘lishi mumkin, lekin men ularni o‘zim ishongan to‘rt inson darajasiga qo‘ymayman. Chunki hayotda nima bo‘lishidan qat’i nazar, oila a’zolaringizdan tashqari boshqa hech kimga sizning sog‘lig‘ingiz ham, omadli va to‘g‘ri bo‘lganingiz ham kerak emas.
“Yangi loyihalardan takliflar bor, lekin hozirgi qilinayotgan narsalar professionalizm emas”
— Kliplardagi rollarimni har bir inson uchun foydali deya olmayman, lekin doim o‘zimga, energiyamga yaqin narsa bo‘lishini xohlaganman va shunaqa loyihalarda chiqishga harakat qilganman. Serial tufayli Turkiyaga ketdim, shuning uchun o‘zim ishlaydigan “Diydor” teatrida spektakllarga qatnasha olmadim. Endi O‘zbekistonga keldim, teatrimizda spektakllar bo‘lib o‘tishi rejalashtirilmoqda. Teatrni juda sog‘inganman. Rahmatli ustoz san’atkor Bahodir Yo‘ldoshev olamdan o‘tganidan keyin teatrimiz huvillab qoldi.
Yangi loyihalardan takliflar bor, lekin hozirgi qilinayotgan narsalar professionalizm emas. Unaqa loyihalarga borib nima qilaman? Men loyiha ustida, xarakter ustida ishlashim kerak. U yerda nima qilaman?
Prezident etirofi
Yulduz Rajabova 2021-yilda Xalqaro xotin-qizlar kuni arafasida Prezident farmoni bilan “Shuhrat” medali bilan taqdirlandi. Aktrisa davlat rahbari bilan uchrashuv haqida intervyularidan birida katta hayajon bilan so‘zlab bergan.
O‘shanda Xalqaro xotin-qizlar kuni munosabati bilan o‘tkazilgan tantanali marosimda O‘zbekiston Prezidenti Shavkat Mirziyoyev aktrisa Yulduz Rajabova ishtirokidagi “Mendirman Jaloliddin” serialini e’tirof etib, uni ijodni susaytirmaslikka chaqirgan edi.
— 8-mart—Xalqaro xotin-qizlar kuni munosabati bilan o‘tkazilgan marosimda davlatimiz rahbari o‘sha tadbirda qatnashgan barcha ayollarni tabriklab, birma-bir so‘rashib chiqdi. Ularning bunday oliyjanobligini ko‘rib, ayrim ayollar xursandligidan yig‘lab ham yubordi.
Prezidentimizning marosimdagi xotin-qizlar bilan so‘rashishlarini sira kutmagandim. Men bilan so‘rashayotgan vaqtda ‘Kino zo‘r chiqdi, ijodni susaytirmang’, deya aytgan e’tirofi juda hayajonlantirdi va o‘zimga nisbatan ishonchni kuchaytirdi. Shuningdek, bunday e’tibor o‘z ustimda yanada qattiq ishlashimga bir turtki bo‘ldi, mas’uliyatni oshirdi.
Izoh (0)