Farmatsevtika tarmog‘ini rivojlantirish agentligi o‘zbekistonliklarni sifatli, xavfsiz va bezarar dori vositalari bilan ta’minlash maqsadida dori vositalarini ishlab chiqaruvchilarga murojaat qilib, ularni ogohlantirdi. Bu haqda “Daryo”ga agentlik axborot xizmati rahbari Sevara To‘laganova xabar berdi.
Aytilishicha, 2024-yil 1-yanvardan boshlab GxP davlat standarti joriy etilmagan tarmoq tadbirkorlik subyektlarining farmatsevtika faoliyati uchun berilgan litsenziyaning amal qilishi to‘xtatib qo‘yiladi yoki bekor qilinadi.
GxP talablarini joriy qilish orqali aholini sifatli, xavfsiz va bezarar dori vositalari bilan ta’minlash imkoniyatiga ega bo‘lamiz. Shuningdek, korxona xodimlari o‘zlariga yuklatilgan vazifalarni o‘z vaqtida sifatli bajarishiga, farmatsevtika mahsulotlari xavfsizligi ishonchli hujjatlar bilan tasdiqlanishiga, korxonalarda xalqaro talablarga javob beradigan sifat tizimining yaratilishiga erishamiz. Va mahalliy mahsulotlarning raqobatbardoshligi hamda chet el davlatlariga eksport qilinishi uchun keng yo‘l ochib berilishini ta’minlaymiz, — deydi Sevara To‘laganova.
Mas’ullarning aniqlik kiritishicha, ushbu vazifalarni amalga oshirish maqsadida prezidentning 2019-yil 10-aprel kuni farmoni chiqqan bo‘lib, farmatsevtika tarmog‘i hamda respublika sog‘liqni saqlash tizimidagi tashkilotlar 2022-yil 1-yanvarga qadar tegishliligi bo‘yicha GxP talablariga muvofiq majburiy sertifikatlashtirilishi lozimligi belgilangan.
Keyinchalik bu muddat prezidentning 2022-yil 21-yanvardagi farmoniga asosan 2024-yil 1-yanvarga qadar uzaytirilgan. Shuningdek, mazkur farmonga binoan 2022-yil 1-apreldan farmatsevtika sohasida yangi ishlab chiqaruvchi korxonalar, ulgurji va chakana savdo tashkilotlari mos ravishda “Zarur ishlab chiqarish amaliyoti (GMP)”, “Zarur distribyutorlik amaliyoti (GDP)” va “Zarur farmatsevtika (dorixona) amaliyoti (GPP)” talablariga muvofiq ravishda tashkil etilishi lozim. 2022-yil 1-fevraldan mahalliy ishlab chiqaruvchi tashkilotlarning farmatsevtika mahsulotlarini xorijiy davlatlarda ro‘yxatdan o‘tkazish xarajatlarining 75 foizi ular ro‘yxatdan o‘tkazilganini tasdiqlovchi hujjat taqdim etilganidan so‘ng Farmatsevtika tarmog‘ini qo‘llab-quvvatlash va rivojlantirish jamg‘armasidan qoplab berilishi va 2023 yil 1-yanvardan farmatsevtika mahsulotlari bo‘yicha davlat xarid tanlovlarida faqatgina “Zarur ishlab chiqarish amaliyoti (GMP)” standartlari asosida dori vositalarini, ISO:13485 standartlari asosida tibbiy buyumlar va tibbiy texnikani ishlab chiqarishni tashkil etgan tashkilotlar va “Zarur distribyutorlik amaliyoti (GDP)” standartlarini joriy etgan ulgurji savdo tashkilotlari qatnashishiga ruxsat berilishi belgilangan, — deydi mas’ul.
Qo‘shimcha qilinishicha, bugungi kunda respublikada dori vositalarini ishlab chiqaruvchi mahalliy korxonalar soni 82 tani tashkil etib, ularning 40 tasida, jami 147 ta ishlab chiqarish liniyalarida “Zarur ishlab chiqarish amaliyoti — GMP” davlat standarti talablari joriy qilingan. Farmatsevtika mahsulotlarini ulgurji sotish bilan shug‘ullanuvchi 600 ga yaqin mahalliy korxonalar mavjud bo‘lib, ularning 117 tasida “Zarur distribyutorlik amaliyoti — GDP” davlat standarti talablari joriy qilingan. Klinikoldi tadqiqotlar o‘tkazuvchi laboratoriyalar soni 6 tani tashkil etib, ulardan 1 tasida “Zarur laboratoriya amaliyoti — GLP” sertifikati mavjud. Klinik tadqiqotlar o‘tkazuvchi klinik bazalar soni 88 ta, farmatsevtika mahsulotlarini chakana realizatsiya qiluvchi dorixonalar soni 16 mingga yaqin bo‘lib, ularning birortasi ham “Zarur klinika amaliyoti — GCP” va “Zarur dorixona amaliyoti — GPP” sertifikatlarini olmagan.
Bu raqamlar farmatsevtika tarmog‘i va respublika sog‘liqni saqlash tizimidagi tashkilotlarning aksariyati tegishliligi bo‘yicha GxP talablarini o‘z ish faoliyatida joriy qilmaganini ko‘rsatadi. Shu sabab Farmatsevtika tarmog‘ini rivojlantirish agentligi farmatsevtika tarmog‘i va respublika sog‘liqni saqlash tizimidagi tashkilotlarida GxP talablarini joriy etish va modernizatsiya ishlarini olib borish bo‘yicha loyihalarni ishlab chiqish hamda o‘rnatilgan muddatlar ichida amalga oshirishga chaqirib qoladi va bu masalada amaliy yordam berishga tayyor ekanligini ma’lum qiladi, — deydi Sevara To‘laganova.
Izoh (0)