Andijonda viloyat hokimi Shuhrat Abdurahmonov hamda sobiq sog‘liqni saqlash vaziri Alisher Shodmonov o‘rtasidagi mojaroga sabab bo‘lgan zavod ayni kunda yiliga 180 million dona bir martalik shpris ishlab chiqarmoqda. Bu haqda Farmasevtika tarmog‘ini rivojlantirish agentligining OAV vakillari uchun hududdagi dori vositalari va tibbiy buyumlarni ishlab chiqaruvchi korxonalarga qilgan press-turi davomida maʼlum qilingan.
Press-turda bo‘lgan “Daryo” muxbirining maʼlumot berishicha, shu kunlarda Andijon shahrida avtomobilsozlik, elektrotexnika, to‘qimachilik, charm-poyabzal, mebelsozlik, farmatsevtika, kimyo sanoati, qurilish materiallari hamda oziq-ovqatni ishlab chiqarish sohalariga ixtisoslashgan hududiy tarmoqlararo sanoat ko‘rgazmasi ham o‘tkazilgan.
Agentlik masʼul xodimi Said Xolmatovning taʼkidlashicha, ayni paytda viloyatda 37 ta farmatsevtika yo‘nalishidagi korxonalar faoliyat ko‘rsatayotgan bo‘lib, ularda 215 turdagi dori, tibbiy buyum va texnikalar hamda biologik faol qo‘shimchalar ishlab chiqarilmoqda. Ushbu korxonalar tomonidan 520 ming dollarlik mahsulotlar eksport qilingan.
Press-tur davomida jurnalistlar, shuningdek, tibbiy buyum va texnikalar ishlab chiqaruvchi korxona faoliyati bilan ham tanishgan. “Makro Farm Andijon” masʼuliyati cheklangan jamiyatiga tegishli korxonada ayni kunda to‘rt xil hajmdagi 180 million dona bir martalik shprislar hamda 20 million dona infuzion tibbiyot sistemalari ishlab chiqarilmoqda.
Qayd etish lozim, ushbu korxona 2019-yilda Andijon hokimi va o‘sha vaqtdagi sog‘liqni saqlash vaziri Alisher Shodmonov mojarosiga sabab bo‘lgandi. O‘shanda viloyat hokimi topshirig‘i asosida sog‘liqni saqlash boshqarmasiga “Makro Farm Andijon” MCHJ bilan qonun talablariga zid ravishda tuzilgan to‘g‘ridan to‘g‘ri shartnomalar asosida jami 6,3 milliard so‘mlik muvofiqlik sertifikati mavjud bo‘lmagan shpris va sistemalar sotib olingani taʼkidlangan.
Jurnalistlar press-tur davomida Andijon tumanidagi insulin ishlab chiqaruvchi Zamin Bio Health korxonasi faoliyati bilan ham tanishgan. Umumiy loyiha qiymati qariyb 28 milliard so‘m bo‘lgan ushbu korxonaga Germaniya, Fransiya, Shveysariya, Xitoy, Hindiston davlatlaridan zamonaviy uskuna va texnologiyalar olib kelib o‘rnatilgan. Bugungi kunga kelib, insulin dori vositasi sifatli, xalqaro standartlar talablari darajasida ishlab chiqarilmoqda.
Korxona menejeri Xurshidbek Yusupovning aytishicha, ushbu zavod 2019-yilda to‘liq quvvatda ishga tushirilgan bo‘lib, shu kunga qadar respublika bo‘ylab insulin dori vositasini yetkazib bermoqda. Shu paytga qadar jami 3 millionga yaqin insulin tibbiyot muassasalariga yetkazib berilgan. Sifat jihatidan esa Yevropa va Birlashgan Arab amirliklarida ishlab chiqariladigan insulin sifati bilan teng hisoblanadi.
Kelgusida mahsulotimizni xorij mamlakatlariga ham eksport qilishni rejalashtirganmiz. Buning uchun salohiyatimiz yetarli, faqat insulin spetsifik mahsulot bo‘lgani uchun uni eksport qilinayotgan mamlakatda davlat ro‘yxatidan o‘tkazish lozim. Shu sababli ayni paytda qo‘shni Afg‘oniston, Tojikiston va Qirg‘iziston Respublikalarining Sog‘liqni saqlash vazirliklariga ariza bilan murojaat qilganmiz. Mazkur davlatlarda ham sertifikatga ega bo‘lganimizdan so‘ng insulin eksporti ham yo‘lga qo‘yiladi, — deydi Xurshidbek Yusupov.
Izoh (0)