Bir necha kun avval o‘g‘li bilan Argentinadan Toshkentga qaytgan xonanda Munisa Rizayeva Instagram’dagi sahifasi orqali jonli efirga chiqdi hamda muxlislarini qiziqtirgan savollarga javob berdi.
— Ko‘rib turgan bo‘lsangiz tirnoqlarim bo‘yalmagan, lakimni olib tashlaganman. Chunki hozirda besh vaqt namozimni o‘qiyapman, mumkinmas. Namozga kichkinaligimdan o‘rganganman. Imkon qadar qoldirmay o‘qishga harakat qilaman. Ba’zan xizmatlar bilan bo‘lib, o‘qiy olmayman, lekin bomdodni har doim o‘qiyman.
O‘g‘lingizning ismini nega sir tutyapsiz?
— O‘g‘limning ismini u bir yoshga kirganida hammaga e’lon qilaman. Uning yuzini ham o‘shanda ko‘rasizlar. Ko‘z tegishidan qo‘rqaman, chunki nazar bor narsa.
O‘g‘lingizga azon ayttirdingizmi?
— Albatta, o‘g‘lim tug‘ilishi bilan turmush o‘rtog‘imning o‘zlari azon aytganlar, bundan tashqari Rahmatullo qori aka Dubaydan videoqo‘ng‘iroq orqali aloqaga chiqib, telefonda azon aytib qo‘yganlar.
Tug‘ruqdan keyin qanday o‘zingizga kelyapsiz?
— Men ayni paytda diyetadaman. Uyimdagi oshpazim Shahnoza menga faqat parhezbop taomlar tayyorlab beradi. O‘zi homiladorlik paytimda uncha ko‘p semirmadim. Bor-yo‘g‘i 4 kilo vazn yig‘dim.
Argentinadan tez qaytishingizga nima sabab bo‘ldi?
— Bolamning qorni ko‘p og‘rib, u juda ko‘p yig‘lardi. Biz dorixonadan umuman dori sotib ololmasdik. Chunki dorilar faqat retsept asosida sotiladi. Shifokorga borsak 1 yoshgacha hech qanday dori mumkinmas, deyishardi. Shuning uchun ham Toshkentga qaytishga majbur bo‘ldik.
Argentinadagi ginekologlar haqida nima deysiz?
— Argentinadagi ginekologlar haqida faqat ijobiy fikr aytishim mumkin. O‘zim u yerda kesarcha kesish orqali tug‘dim. Qornimdagi choklar shunaqa mahorat bilan tushirilganki, deyarli sezilmaydi.
Turmush o‘rtog‘ingiz nima sababdan Argentinada qoldi?
— Turmush o‘rtog‘imning Argentinada katta bizneslari bor. Bundan tashqari bizning hujjat ishlarimiz ham chala qoldi. Men o‘g‘limni olib Toshkentga qaytganimdan so‘ng, turmush o‘rtog‘im o‘sha ishlarni hal qilmoqda. Ular bir oylarda yonimga qaytadilar.
Konserti haqida
— 24-oktyabr kuni Toshkentda konsert berishni rejalashtiryapman. O‘sha sanaga hozir joy bron qilishimiz kerak.
“Rossiyada yurgan vatandoshlarimizga qayting, deyman”
— Rossiyadagi hamyurtlarimizga yuragim achishadi. Qaytinglar O‘zbekistonga, nima qilasizlar u yerlarda qiynalib? Yangiliklarni o‘qib, videolarni ko‘rib rosa asabiylashaman. Bizni yurtdoshlarimizga nisbatan bo‘layotgan hurmatsizlik meni xafa qiladi. Rossiyada topayotgan pulingiz O‘zbekistonda ham bor, shuning uchun qaytinglar.
Izoh (0)