Islomobod shahrida 15—16-oktyabr kunlari Shanxay Hamkorlik Tashkiloti hukumat rahbarlari kengashining navbatdagi majlisi bo‘lib o‘tdi. Bu haqda O‘zbekiston bosh vaziri matbuot xizmati xabar berdi.
Maʼlum qilinishicha, bosh vazir Abdulla Aripov 16-oktyabr kuni mazkur sammitda ishtirok etdi.
Uchrashuvda tomonlar xalqaro vaziyat keskinlashayotgani, davlatlar o‘rtasidagi o‘zaro ishonch susayayotgani, qarama-qarshilik va raqobat kuchayayotgani, ekologiya, oziq-ovqat va energetika xavfsizligi sohasidagi tahdidlar natijasida geosiyosiy keskinlik vujudga kelayotganiga eʼtibor qaratdi.
Shavkat Mirziyoyev SHHTning Ostona sammitida so‘zlagan nutqida ushbu masalaga to‘xtalib “Bunday murakkab vaziyatda SHHTning asosi bo‘lgan tamoyillarga sodiqligimizni saqlash va yanada mustahkamlash favqulodda muhimdir. Ana shu tamoyillar tufayli Tashkilot bugungi yutuqlarga erishdi, xalqaro masalalarda yuksak nufuz va barqarorlashtiruvchi o‘ringa ega bo‘ldi”, deya taʼkidlagan edi.
O‘zbekiston bosh vaziri mamlakatlar ulkan iqtisodiy salohiyatga ega ekanini inobatga olib, birgalikdagi saʼy-harakatlar bilan tashkilot makonida ko‘ptomonlama sheriklik mustahkamlanishini taʼminlash mumkinligini qayd etdi. Davlat rahbari tomonidan bu borada Shanxay hamkorlik tashkilotiga aʼzo davlatlar rahbarlari kengashining Ostona shahrida bo‘lib o‘tgan yig‘ilishida ilgari surgan taklif va tashabbuslarini qo‘llab-quvvatlashga chaqirdi.
Savdo to‘siqlarini bartaraf etish, texnik reglamentlar va sertifikatlashtirish, fitosanitariya hamda veterinariya nazorati tizimlarini yaqinlashtirish bo‘yicha qo‘shma chora-tadbirlarni kiritish muhim ahamiyatga egaligi qayd etildi.
O‘zaro investitsiyalarni, birinchi navbatda, infratuzilma, yuqori texnologiyali sanoat va xizmat ko‘rsatish sohasini rag‘batlantirish bo‘yicha kompleks chora-tadbirlarni tayyorlash, samarali ishbilarmonlik muloqoti platformasini yaratish maqsadida har yili SHHT Expo xalqaro sanoat ko‘rgazmasini tashkil etish taklif etildi.
Xitoy-Qirg‘iziston-O‘zbekiston temir yo‘li va Transafg‘on yo‘lagini qurish bo‘yicha loyihalar alohida ahamiyatga ega ekani taʼkidlandi.
Yig‘ilishda O‘zbekistonda “yashil” energetikani jadal rivojlantirish bo‘yicha kompleks dastur amalga oshirilayotgani maʼlum qilindi.
Xususan, har yili taxminan 2 GVt quyosh va shamol energiyasini ishlab chiqarish quvvati joriy qilinmoqda. “Yashil” vodorodni sanoatda ishlab chiqarish loyihasi ustida amaliy ishlar boshlandi.
Kam uglerodli rivojlanishga o‘tish tendensiyasini hisobga olgan holda, mamlakatlarimiz energetika vazirliklariga qayta tiklanadigan energiya manbalariga investitsiyalar va texnologiyalarni jalb qilishni rag‘batlantirish bo‘yicha keng qamrovli hamkorlik rejasini ishlab chiqish taklifi ilgari surildi.
Majlisda IT sohasi va raqamli texnologiyalarni rivojlantirish, aholi turmush darajasini yuksaltirish, oziq-ovqat xavfsizligini taʼminlash, iqlim o‘zgarishiga qarshi kurashda samarali hamkorlik qilish, o‘zaro ishonch, yaxshi qo‘shnichilik va do‘stlikni mustahkamlash singari masalalar yuzasidan ham atroflicha mulohazalar bildirildi.
Majlis so‘nggida qator hujjatlar imzolandi.
Izoh (0)