Farg‘ona viloyati hokimi Xayrullo Bozorov Bangladeshning O‘zbekistondagi elchisi Muhammad Monirul Islomni qabul qildi. Bu haqda viloyat hokimligi matbuot xizmati xabar berdi.
Uchrashuvda Farg‘ona viloyati bilan Bangladesh davlati o‘rtasidagi savdo-iqtisodiy aloqalar doiralarini kengaytirish, jumladan, to‘qimachilik, qishloq xo‘jaligi, farmatsevtika, terini qayta ishlash, IT sohalarida hamkorlikni yo‘lga qo‘yish masalalari muhokama etildi.
Viloyat rahbari Farg‘ona viloyatining iqtisodiy va investitsiyaviy imkoniyatlari, infratuzilma va logistika sharoitlari bilan tanishtirdi. Bangladesh bilan savdo-iqtisodiy va madaniy-maʼrifiy aloqalarni yanada rivojlantirishda hududlararo hamkorlikni faollashtirish muhimligini taʼkidladi.
Muhammad Monirul Islom Farg‘ona viloyati va Bangladesh davlati o‘rtasidagi hamkorlikni rivojlantirish masalalariga to‘xtaldi hamda bu boradagi aloqalarni jadallashtirish bo‘yicha fikr almashildi. Xususan, elchi to‘qimachilik sanoatida birga ishlashga tayyorligini aytib, bangladeshlik mutaxassis va muhandislarni viloyatga yuborishini bildirdi.
Shuningdek, charm-poyabzal, qishloq xo‘jaligi mahsulotlarini yetishtirish, savdo-sotiq sohasida hamkorlikni yo‘lga qo‘yish, raqamli texnologiyalar bo‘yicha viloyatdagi oliy o‘quv yurtlari bilan aloqalarni o‘rnatish masalalariga to‘xtaldi. Bangladeshda farmatsevtika sohasi rivojlanganligi, 140 dan ortiq davlatlarga mahsulotlar eksport qilinayotganligi qayd etilib, bu yo‘nalishda hamkorlik qilish bo‘yicha fikr bildirildi.
Izoh (0)