O‘zLiDeP har bir viloyatda yoshlar ijtimoiy-iqtisodiy markazlari tashkil etish tarafdori

O‘zbekiston Liberal-demokratik partiyasining saylovoldi tashviqoti tadbirlari doirasida Buxoro davlat universitetida partiyadan ko‘rsatilgan nomzodlar ishtirokida navbatdagi uchrashuv bo‘lib o‘tdi. Unda Partiya yetakchisi A. Xaitov, Qonunchilik palatasi va mahalliy kengash deputatligiga nomzodlar, universitetning professor-o‘qituvchilari, talaba yoshlar ishtirok etdi.

Eʼtiborlisi, partiya saylovoldi dasturida yoshlarni hunar va zamonaviy kasblarga, xorijiy tillarga o‘qitish, maʼnaviyatini, maʼrifatini yuksaltirish, kitobxonligini oshirish, ijtimoiy qo‘llab-quvvatlash hamda IT sohasi va sportga keng jalb etish borasida puxta ishlangan rejalarini amalga oshirish, yoshlar bandligi va ishbilarmonligini faol qo‘llab-quvvatlash, xususan, ishsiz yoshlarni zamonaviy kasblarga o‘qitish tizimini tubdan qayta ko‘rib chiqish singari dolzarb masalalar keng o‘rin olgan. Bu esa hech shubhasiz, yosh avlodning jamiyatimizda tutgan o‘rnini yanada mustahkamlashga xizmat qiladi.

Yoshlarni kasb-hunarga tayyorlash amaliyotining aynan korxonalar buyurtmasi asosida joriy etilishi ham saylovoldi dasturda o‘z ifodasini topgan. Shuningdek, mamlakatimizning har bir viloyatida kamida 100 gektar maydonda “Yoshlar ijtimoiy-iqtisodiy markazi”ni tashkil etish ham partiya zimmasidagi muhim vazifa bo‘lib hisoblanadi. Bundan tashqari yosh avlodni tadbirkorlikka jalb qilish uchun joylardagi mikromoliyalash xizmatlarini kengaytirish va tegishli asbob-uskunalardan keng foydalanish uchun zarur imkoniyatlarni yaratishga ham partiya o‘z diqqat eʼtiborini qaratadi.

O‘z biznesini ijaraga olingan binoda boshlayotgan yoshlarga bir yillik ijara xarajatining 50 foizini qoplab berish vazifasi ham saylovoldi dasturida aniq-ravshan belgilab berilgan.

Deputatlikka nomzodlar shular haqida so‘z yuritar ekanlar, buxorolik yoshlar ham bu imkoniyatlardan kelgusida unumli foydalanishlari mumkinligini, O‘zLiDePning saylovoldi dasturida aks ettirilgan ustuvor vazifalar ijrosi mustaqil hayot ostonasida turgan yigit-qizlar uchun haqiqiy dasturilamal bo‘lib xizmat qilishini taʼkidladilar.

Yoshlar bilan o‘tkazilgan muloqotda so‘z olgan O‘zLiDeP rahbari Aktam Xaitov barchani partiya va uning nomzodlari uchun yakdillik bilan ovoz berishga chaqirdi.