Raqamli texnologiyalar vazirligi vakillari tomonidan O‘zbekiston yoshlarini IT sohasida Yaponiya IT universitetlarining ilg‘or dasturlari asosida o‘qitish, iqtidorli yoshlarni IT sohasida Yaponiyada maoshi yuqori bo‘lgan ishga joylash maqsadida qator kelishuvlarga erishildi.
Vazirlik matbuot xizmatining ma’lum qilishicha, Yaponiya va O‘zbekistonning turli sohalardagi ilg‘or kompaniyalari, oliy ta'lim muassasalari hamda tadqiqot institutlari ishtirokida bo‘lib o‘tgan “O‘zbekiston – Yaponiya” biznes forumi doirasida Raqamli texnologiyalar vazirligi vakillari tomonidan O‘zbekistonda IT sohasi istiqbollari, investitsion jozibadorlik hamda yoshlarni IT ta’limga o‘qitish mavzusida taqdimot o‘tkazildi.
Unda IT sohani rivojlantirish bo‘yicha quyidagi kelishuvlarga erishildi:
- Vazirlik va CAL Co., Ltd kompaniyasi o‘rtasida O‘zbekistonda IT ta’limni rivojlantirish va iqtidorli yoshlarni Yaponiyada IT sohasida ish bilan ta’minlash yo‘nalishida Anglashuv memorandumi;
- Digital Knowledge Co., Ltd kompaniyasi hamda Japan Digital University universiteti bilan O‘zbekistonda generativ sun’iy intellektdan foydalangan holda Yaponiyaning ta’lim texnologiyalarini joriy etish yo‘nalishida uch tomonlama Niyat memorandumi;
- Yaponiyaning Kompyuterlashtirish bo‘yicha xalqaro hamkorlik markazi (Center of the International Cooperation for Computerization — CICC) o‘rtasida Yaponiyaning IT kompaniyalari O‘zbekiston bozoriga kirib kelishi va o‘zaro tajriba almashinuvini yo‘lga qo‘yish maqsadida Raqamli hamkorlik aloqa qo‘mitasi (Liaison Committee for Digital Cooperation)ni tashkil qilish bo‘yicha hamkorlikni yo‘lga qo‘yish uchun Niyat memorandumi imzolandi.
Yaponiya IT kompaniyalari bilan erishilgan hamkorlik natijasida O‘zbekiston yoshlari Yaponiyaning yuqori sifatli oliy ta'lim dasturlari asosida O‘zbekiston va Yaponiyada tahsil olish, Yaponiyaning IT kompaniyalarida amaliyot o‘tash va IT mutaxassisi sifatida Yaponiyada yuqori maoshli ish o‘rinlarini egallashga muvaffaq bo‘ladi.
2023-yilning iyulida Yaponiyalik ish beruvchilar O‘zbekistondan axborot texnologiyalari sohasi mutaxassislarini jalb qilish niyatida ekanini ma’lum qilgandi.
Tashqi mehnat migratsiyasi agentligida Yaponiyaning CAL Co.,Ltd va Center of the International Cooperation for Computerization kompaniyalari rahbariyati bilan uchrashuv o‘tkazilib, unda Yaponiyada IT sohasida ishchi kuchi yetishmasligini inobatga olgan holda, O‘zbekistondan mutaxassislar jalb qilish, buning uchun sohani mukammal o‘rgatish maqsadida yaponiyalik ushbu soha vakillarini jalb qilish hamda yapon tili kurslarini tashkil etishga doir masalalar muhokama qilingandi.
Ushbu kompaniyalar ayni paytda Janubiy Koreya va Mo‘g‘ulistonda axborot texnologiyalari maktablarini ochib, shu kunga qadar 300 ga yaqin mutaxassisni tayyorlab, o‘z kompaniyasiga ishga joylashtirgan.
Izoh (0)