Buyuk Britaniya va Norvegiya mudofaa vazirlari Jon Xili hamda Tore Sandvik 20-fevral kuni uchrashdi. Ular Arktikada Rossiya tahdidiga qarshi turishga qaratilgan mudofaa kelishuvini muhokama qildi. Bu haqda Politico xabar berdi.
Yangi shartnoma Britaniya va Norvegiya qurolli kuchlari o‘rtasidagi hamkorlikni kuchaytirish, jumladan, 2022-yilda Rossiyaning Ukrainaga keng ko‘lamli bosqinidan keyin tez-tez sodir bo‘layotgan diversiyalardan suvosti kabellarini himoya qilishni nazarda tutadi. Yevropa mamlakatlari Rossiya portlariga yo‘l olayotgan yoki u yerdan kelayotgan kemalarni, ayniqsa Boltiq dengizida, asosiy infratuzilma aloqa tarmoqlariga hujum qilishda gumon qilmoqda.
Xili uchrashuv davomida Norvegiya Buyuk Britaniyaning eng muhim ittifoqchilaridan biri ekanini ta’kidladi.
“Biz ortib borayotgan tahdidlarga qarshi kurashayotganimiz, NATOni mustahkamlayotganimiz va Uzoq Shimolda xavfsizligimizni oshirayotganimiz sababli, bizni har qachongidan ham ko‘proq yaqinlashtiradigan mudofaa hamkorligining yangi davrini yaratamiz”, dedi u.
Britaniya mudofaa vaziri esa mamlakat Yevropada xavfsizlikni ta’minlashda “yetakchi rol o‘ynash”ni maqsad qilganini ta’kidladi. Uning so‘zlariga ko‘ra, Britaniya raqiblarga “biz o‘z manfaatlarimizni himoya qilishda yakdil ekanlimizni” ko‘rsatishga tayyor.
Vazirlar o‘rtasidagi muzokaralar Ukrainada tinchlik o‘rnatish boshlanishi munosabati bilan AQSH va Yevropa o‘rtasidagi keskinlikning kuchayishi fonida bo‘lib o‘tdi. Ticnhlik muzokaralarida hozircha Ukrainaning o‘zi ham, uning Yevropadagi ittifoqchilari ham amalda ishtirok etmayapti.
AQSH urushni to‘xtatish bo‘yicha muzokaralarda Yevropa ishtirok etmasligini ma‘lum qildi
Muzokaralar stolida ukrainlar va ruslar — amerikaliklar esa vositachi bo‘ladi, dedi Trampning maxsus vakili Kit Kellog.
Finlyandiya prezidenti Aleksandr Stubb bunga javoban Ukraina, uning kelajagi yoki Yevropa xavfsizlik tuzilmasi haqida yevropaliklarsiz muhokama yoki muzokaralar olib borishning iloji yo‘qligini qayd etdi. Yevropa davlatlari yetakchilari 17-fevral kuni Parijda Ukraina bo‘yicha favqulodda sammit o‘tkazadi. Tomonlar yana xuddi shunday sammit o‘tkazishni rejalashtirmoqda.
Izoh (0)