Milliarder va Citadel xej-fondi asoschisi Ken Griffin Nyu Yorkdagi Sotheby’s kimoshdi savdosida deyarli to‘liq stegozavr skeletini rekord darajadagi 44,6 million dollarga sotib oldi. Bu haqda The Wall Street Journal xabar berdi.
Nashrning yozishicha, Apeks laqabli dinozavr skeleti taxminan 150 million yoshda. U 2022-yilda Koloradoda paleontolog Jeyson Kuper tomonidan topilgan.
Bu topilgan eng to‘liq stegozavr skeleti bo‘lib, unda taxminan 319 ta asl suyakdan 254 tasi bor, deya qayd etadi The Guardian.
Bundan tashqari, Apeks eng yaxshi saqlangan stegozavr skeleti hisoblanadi.
Sotheby’s auksion uyi skelet olti million dollargacha sotilishini kutgandi. Dinozavr qoldiqlari narxi bo‘yicha avvalgi rekord 2020-yilda o‘rnatilgan. O‘shanda yoshi taxminan 67 million yil bo‘lgan tiranozavr skeleti Nyu Yorkdagi Christie’s auksionida deyarli 32 million dollarga sotilgan.
Griffin o‘z xaridini sharhlar ekan, skeletni Amerika muzeyiga sovg‘a qilishni rejalashtirayotganini aytgan.
Apeks Amerikada tug‘ilgan va shu yerda qoladi, deydi milliarder.
Ken Griffin tarixiy mulk uchun auksionlarda birinchi marta g‘alaba qozonishi emas. 2021-yilda u AQSH konstitutsiyasi ilk nashrining nodir nusxasini 43,2 million dollarga sotib olgan. U nusxa Qo‘shma Shtatlarda qolishiga ishonch hosil qilish uchun kriptoinvestorlar guruhini ortda qoldirgan. Keyinchalik milliarder konstitutsiyani Bentonvildagi Cristal Bridges Amerika san’ati muzeyiga topshirgan.
Izoh (0)