AQSH prezidenti Jo Bayden Tayvanga qurol yetkazib berish va boshqa harbiy yordam uchun 567 million dollar ajratishni buyurdi. Bu haqda Oq uy saytida chop etilgan press-relizda aytiladi.
“Qo‘shma Shtatlar Konstitutsiyasi va qonunlari bo‘yicha menga prezident sifatida berilgan vakolatga ko‘ra, men davlat kotibiga Tayvanga yordam uchun Pentagonning mudofaa mahsulotlari va xizmatlari, shuningdek, harbiy taʼlim va kadrlar tayyorlash uchun 567 million dollargacha mablag‘ ajratishni buyuraman”, deyiladi hujjatda.
2023-yilda AQSH Tayvanga 345 million dollar miqdorida harbiy yordam ajratdi. Shuningdek, joriy yil iyun oyida AQSH Tayvanga 300 million dollarga dronlar sotishni ma'qulladi.
Xitoy Tayvanni o'z hududi deb hisoblaydi va Amerika hukumatining bunday harakatlarini bir necha bor tanqid qilgan. Xitoy Mudofaa vazirligi Qo'shma Shtatlarni Tayvan bilan "harbiy til biriktirishni" to'xtatishga chaqirdi.
Avvalroq Xitoy AQSHdan "yagona Xitoy" tamoyiliga amal qilishni so‘ragani xabar qilingandi.
Xitoy tashqi ishlar vaziri Van Ining fikricha, bu Vashington va Pekin o‘rtasidagi diplomatik munosabatlarning asosidir.
“Agar Qo‘shma Shtatlar haqiqatan ham Tayvan bo‘g‘ozida tinchlik va barqarorlikka umid qilsa, u "yagona Xitoy" tamoyiliga rioya qilishi, uchta qo‘shma kommyunikeni amalga oshirishi, Tayvanni qurollantirishni to‘xtatishi, "Tayvan mustaqilligi"ga ommaviy ravishda qarshi chiqishi va Xitoyning tinch yo‘l bilan birlashishini qo‘llab-quvvatlashi kerak”, dedi Van I AQSH davlat kotibi Entoni Blinken bilan BMT Bosh Assambleyasining 79-sessiyasi doirasidagi uchrashuvda.
Izoh (0)