Braziliya prezidenti Jair Bolsonaru AQSh prezidenti saylovlarida ovozlarni hisoblash jarayonida firibgarlik yuz bergani borasida dalillarga ega ekanligini aytdi, deb yozadi “RBK”.
“Menda axborot manbalari bor… ularning kimligini aytmayman, maylimi? U yerda rostdan ham ko‘p sonli qalbakilashtirish holatlari bo‘lgan”, — dedi Bolsonaru matbuot bilan muloqot chog‘ida.
U saylov natijalari haqidagi yakuniy qarorni AQSh Oliy sudi qabul qiladigan vaziyat yuzaga kelishi mumkinligini qo‘shib qo‘ydi.
Eslatib o‘tamiz, AQShda prezidentlik saylovi 2020-yilning 3-noyabr kuni bo‘lib o‘tdi, ovozlar bir necha kun davomida hisoblab chiqildi, 7-noyabr kuni AQShning yirik OAVlari saylovda Bayden g‘alaba qozonganini ma’lum qildi. Donald Tramp esa mag‘lubiyatni tan olmadi va saylov bo‘yicha sudga murojaat qilishini bildirdi. U saylovlar qonunbuzarliklar bilan o‘tgan degan fikrda, shuningdek, saylovlarda mamlakat konstitutsiyasi buzilganini aytgan.
Keyinroq Donald Tramp ma’muriyati Jo Baydenga hokimiyatni topshirishga tayyorligini bildirgan edi. Shundan keyin Bayden o‘z ma’muriyatining asosiy a’zolarini shaxsan tanishtirdi. Shuningdek, demokrat Jozef Baydenga razvedka tomonidan davlat rahbari uchun tayyorlanadigan kunlik maxfiy hisobotlarni taqdim etishga ruxsat berildi.
Ba’zi chet mamlakatlar rahbarlari, xususan, Fransiya, Isroil, Ukraina, Venesuela prezidentlari va Kanada bosh vaziri Jo Baydenni davlat rahbari lavozimiga saylangani bilan tabriklashga ulgurdi.
Izoh (0)